Shymkent qalasyna qytaıdyń Vero Cell Sinopharm vaksınasynyń 40 myń dozasy jetkizildi. Bul jaıynda qalalyq densaýlyq saqtaý basqarmasynyń basshysy Baqytjan Pozılov málim etti. 

Sinopharm kompanıasynyń Vero Cell vaksınasy endi shymkenttikterge qoljetimdi! Qalaǵa jetkizilgen 40 myń doza ekpe emhanalarǵa úlestirilip berildi. Vero Cell vaksınasy álemniń 45 elinde, sonyń ishinde Qytaı, Birikken Arab Ámirlikteri, Túrkıa, Serbıa, Belarýs, Bahreın jáne basqa elderde sátti qoldanylady. Dúnıejúzilik densaýlyq saqtaý uıymy Vero Cell vaksınasyn osy jyldyń 7 mamyrynan bastap paıdalanýǵa maquldady.

Qalanyń bas dárigeri bul vaksınanyń ereksheligin de atap ótti. Onyń aıtýynsha, vaksınany saqtaýda qatań talaptardyń bolmaýy resýrstardyń jetispeýshiligi jaǵdaıynda óte yńǵaıly eken. Bul álemdegi ampýlasy arnaıy monıtormen qamtamasyz etilgen alǵashqy vaksına, atalǵan monıtor japsyrma vaksınany jyly ortaǵa salǵan kezde túsin ózgertedi, bul medısına qyzmetkerlerine ony paıdalaný kezinde qaýipsizdik talaptarynyń saqtalýyn qamtamasyz etýge múmkindik beredi.

Endi qala turǵyndary bes túrli vaksınanyń birin tańdaı alady. Olar: Qaraǵandy qalasynda shyǵarylatyn reseılik «Spýtnık V», qazaqstandyq QazVac, BAÁ elinde daıyndalǵan Sinopharm kompanıasynyń HayatVax ekpesi, Qytaıdyń Sinovac Biotech kompanıasy jasap shyǵarǵan Coronavac jáne Sinopharm kompanıasynyń Vero Cell vaksınasy