"Odaqtas aýǵandar Ulybrıtanıaǵa birjola kóship kete alady" dep habarlady brıtan ishki ister mınıstrligi.

Ulybrıtanıa 13 tamyzdan bastap Aýǵanstannan qonys aýdarý jáne kómek saıasatyna quqyly 8000-nan astam adamdy evakýasıalady.

Biraq aǵylshyn saıasatkerleri Aýǵanstanda qalyp qoıǵan, ómirine áli de qaýip tónip turǵan kóptegen aýǵandar úshin ne isteý kerek ekenin talqylap jatyr. Brıtanıa áskeri tamyzdyń sońynda Aýǵanstannan ketip, Aýǵanstandaǵy 20 jyldyq áskerı mısıasyn aıaqtaǵan.

Ulybrıtanıa syrtqy ister mınıstri Domınık Raab Aýǵanstanda qalǵan Ulybrıtanıaǵa kelýge quqyly adamdardyń sany týraly "naqty" aqparat aıta almaıtynyn málimdedi.

İshki ister mınıstrligi "Jyly qarsy alý operasıasy" dep atalatyn jospary týraly tolyǵyraq málimdeı otyryp, Ulybrıtanıaǵa kelgen aýǵandardyń ómirin qalpyna keltirýge kómek bergisi keletinin aıtty.

"Aýǵanstandyq qonys aýdarý jáne kómek saıasaty" burynǵy kelgen aýǵandarǵa arnalǵan saıasat bolatyn. Ol saıasat buǵan deıin Ulybrıtanıadaǵy jergilikti jumyspen qamtylǵan aýǵandar men olardyń otbasylaryna arnalǵan. Olardyń ómirine Talıbannan qaýip bar dep baǵalanǵan.

Buǵan deıin Ulybrıtanıaǵa ýaqytsha turýǵa ruhsat berilgender endi ımıgrasıalyq statýsyn ózgerte alady. "Bul quqyqtar tálipterden qysym kórgen aýǵandarǵa Ulybrıtanıada shekteýsiz turaqty jumysqa qol jetkizýge múmkindik beredi" dep málimdedi aǵylshyn úkimeti.

Al premer-mınıstr Borıs Djonson Aýǵanstanda qarýly kúshtermen jumys istegenderge Ulybrıtanıa úlken qaryzdar ekenin aıtty.

"Men olarǵa jáne olardyń otbasylaryna Ulybrıtanıada ómirlerin qalpyna keltirý úshin qajetti qoldaý kórsetetinimizge senimdimin. Men bul óte qıyn ýaqyt bolatynyn bilemin. Olarǵa brıtanıalyqtar burynǵydaı qoldaý men jomart júrekterin syılaıdy dep  úmittenemin" dedi Borıs Djonson. 

Buǵan deıin demokratıalyq Batys elderiniń saıasatkerleri tálipterden zardap shekken halyqqa kómektesý saıasatyn ázirlep jatqany jarıalanǵan. Germanıa áli de 40 myń aýǵandy qabyldaıtynyn málimdedi.