QR Bas prokýratýrasynyń

QR Memlekettik qyzmet isteri agenttiginiń

QR Sybaılas jemqorlyqqa qarsy is-qımyl agenttiginiń 

Nazaryna!

Almaty qalasy Áýezov aýdanynyń turǵyny 3-toptaǵy múgedek Talǵat Kamalıev qala qurylysyn baqylaý basqarmasynyń basshysy Bahytjan Naýryzbekov zańsyzdyqtarǵa jol berip otyr degen pikirde.

Ol Naýryzbekov basqarma basshylyǵyna kelgeli jekelegen qurylys kompanıalarynyń múddelerin qoldaý jaǵdaılary jıilep ketkenin, onyń qylmystyq áreketterinen qalanyń sáýlettik kelbetine nuqsan kelip jatqanyn aıtady. Sondaı-aq Talǵat Kádesuly "lısensıa alý úshin, zańsyz qurylystardy toqtatpaý úshin, jer telimderin májbúrli túrde alyp qoıý belgili bir baǵa paıda boldy" dep otyr.

– Onyń (Bahytjan Naýryzbekov - red) qylmystyq áreketteriniń kesirinen qalanyń sáýlettik kelbeti joǵalýda. Qala ortalyǵy tyǵyzdanyp jatyr. Buǵan deıin prezıdent Qasym-Jomart Toqaev 2019 jylǵy 29 qazanda jergilikti atqarýshy organdarǵa qalanyń ortalyq bólikterinde tyǵyz qurylys salýǵa tyıym salýdy tapsyrǵan bolatyn. Alaıda Almatyda qurylys jumystary belsendi túrde jalǵasyp qana qoımaı, olardyń sany da ulǵaıýda. Naýryzbekov tarapynan qurylys nysandaryna baqylaýdyń bolmaýyna baılanysty megapolıs turǵyndaryna qaýip tónip tur, – deıdi Talǵat Kamalıev.

Sózinshe, Naýryzbekov tarapynan jasalǵan zańbuzýshylyqtar men áreketsizdikterge, kvalıfıkasıasyna saı kelmeıtinine quzyrly organdar tarapynan nazar aýdarylyp, eskertý jasalǵan. Alaıda eskertý tek qaǵaz júzinde qalyp, naqty shara qabyldanbaǵan.

– Máselen, prezıdent ákimshiligi tekserisi barysynda jaýapty laýazymdy qyzmetterge tıisti tájirıbesi joq adamdardyń taǵaıyndalǵany anyqtalǵan. Naýryzbekov buryn-sońdy bul salada jumys istemegen. Ol aýdan ákimi apparatynyń kásipkerlikti jáne ónerkásipti damytý bóliminiń basshysy, Medeý aýdany ákiminiń orynbasary, Kásipkerlik jáne ındýstrıalyq-ınnovasıalyq damý basqarmasynyń basshysy qyzmetterin atqarǵan. Al qala qurylysyn baqylaý basqarmasy sáýlet-qurylys salasyndaǵy memlekettik baqylaý, lısenzıa, attestasıa berý, qala aýmaǵy jerin aıdalaný men kúzetý salalaryna jaýapty. Sondaı-aq Indýstrıa jáne ınfraqurylymdyq damý mınıstrligi Qurylys jáne turǵyn úı-kommýnaldyq sharýashylyq isteri komıteti júrgizgen tekseris barysynda Naýryzbekov biliktilik talaptaryna sáıkes kelmeıtin lısenzıalar bergeni anyqtaldy, – deıdi shaǵymdanýshy.

Talǵat Kamalıevtiń sózinshe, qala qurylysyn baqylaý basqarmasy basshysynyń orynbasary Oljas Tólebaev 2019 jyldan bastap qazirgi ýaqytqa deıin Qazaqstan Respýblıkasy Ákimshilik quqyq buzýshylyq týraly kodeksiniń 309-babynan 323-babyna deıin kózdelgen ákimshilik quqyq buzýshylyqqa kináli dep taný jáne aıyppul túrinde ákimshilik jaza qoldaný týraly qaýlylar shyǵarǵan. Shyǵarylǵan qaýlylar zańsyz jáne negizsiz. Óıtkeni ákimshilik quqyqbuzýshylyq týraly kodekstiń 2-bóligi 2 taraýyna saı, ákimshilik quqyqbuzýshylyqtardy qaraýǵa jáne ákimshilik jaza taǵaıyndaýǵa tek qalanyń bas memlekettik qurylys ınspektory (qala qurylysyn baqylaý basqarmasynyń basshysy - red) ǵana quqyly. Onyń orynbasarynda mundaı quqyq joq.