Germanıa kansleri Angela Merkel Aýǵanstannyń kóp bóligin baqylaýǵa alǵan Talıbanmen saıası dıalogqa kelýdi jaqtaıtynyn aıtty.

"Talıbanǵa qatysty, árıne, biz olarmen sóılesýimiz kerek, óıtkeni másele qazir sheshilýi tıis" dedi Merkel Germanıanyń batysyndaǵy Hagen qalasyna barǵanda.

Onyń aıtýynsha, kelissózder Aýǵanstannan shyǵyp úlgermeı qalǵan aýǵandardy evakýasıalaý úshin qajet.

"Biz, ásirese, Germanıanyń damý uıymdarynda jumys istegen jáne qazir ómirine qaýip tóngen adamdardy elden shyǵarǵymyz keledi" dep qosty Merkel.

Onyń aıtýynsha, dıalog Aýǵanstanǵa gýmanıtarlyq kómekterdi jalǵastyrýǵa múmkindik beredi. Nemis kóshbasshysy Kabýl halyqaralyq áýejaıynyń jaqynda reıster úshin ashylǵany "jaqsy sıgnal" ekenin aıtty.

Buǵan deıin Ulybrıtanıa da táliptermen tikeleı kelissóz júrgizý kerek ekenin málimdegen. Alaıda Talıbandy jaqyn arada moıyndamaıtynyn aıtqan.