Bilim jáne ǵylym mınıstrligi oqý jylynyń basynan bilim jáne ǵylym salasynda sapany qamtamasyz etý komıtetine 70-ke jýyq ótinish kelip túskenin habarlady.
Vedomstvo basshysy Asqat Aımaǵambetov mınıstrliktiń apparat jınalysynda áli de óte kóp shaǵym kelip jatqanyn aıtty.
– Ár shaǵym boıynsha tıisti sharalar qabyldanyp jatyr. Qyzmetinen bosatý, tártiptik jaýapkershilikke tartý jumystary jalǵasady. Muǵalim tek balalarǵa sabaq berý kerek. Basqa jumystarǵa aralasýǵa tyıym salynady. Qaǵazbastylyqtan arylý jumystary da jalǵasady. Bul másele meniń nazarymda bolady. Eń birinshi biz bilim basqarlamalarynan bastaýymyz kerek. Taǵy da eskertemin eger zań buzylatyn bolsa, qatań shara qabyldaıtyn bolamyz, – dedi mınıstr.
Aımaǵambetov aıtqan shaǵymdardyń kópshiligi bilim mınıstrliginiń resmı saıtynda jarıalandy.
Máselen, Túrkistan oblysynda balabaqsha tárbıeshisi qyzmetinen zańsyz bosatylǵan. Alaıda ákimdiktiń bilim basqarmasy onyń quqyǵyn qalpyna keltirý boıynsha sharalar qabyldamaǵan. Bilim salasynda sapany qamtamasyz etý jónindegi aýmaqtyq departament qyzmetkerleriniń aralasýynan keıin ǵana tárbıeshi burynǵy jumysyna qaıtyp oralǵan.
Atyraý oblysynda pedagogıkalyq etıka erejelerin buzǵany úshin Q. Ahmedıarov atyndaǵy orta mekteptiń muǵalimi jumysynan bosatylǵan.
Almaty oblysynda departament qyzmetkerleri muǵalimniń ótinishinen keıin sharalar qabyldaǵan. Ótinishte muǵalim bilim berý uıymdarynda aqsha jınaý jáne olarǵa tán emes fýnksıalarǵa tartý faktileri týraly habarlaǵan. Másele qaralǵannan keıin Tekeli qalasyndaǵy №6 orta mektebiniń dırektoryn qyzmetinen bosatý týraly sheshim qabyldanyp, osyǵan uqsas faktiler rastaldy. Sonymen qatar Tekeli qalasy ákimdiginiń bilim bólimi basshysynyń m.a. tártiptik jaýapkershilikke tartý usynyldy.
Pedagogterdiń quqyqtary men zańdy múddeleriniń eń kóp buzylýy Túrkistan jáne Almaty oblystarynda baıqalady.
Sondaı-aq áleýmettik jelilerde ımmýnızasıalaý sharalary boıynsha tizim jasaý týraly qujat jarıalandy. Mundaı aqparatty jınaý jónindegi buıryq BǴM tarapynan qarastyrylmaǵan. Aýdandyq bilim bóliminiń basshysy tártiptik jaýapkershilikke tartyldy.
Bilim jáne ǵylym mınıstriniń tapsyrmasy boıynsha ár oblysta pedagogıkalyq ádep jónindegi komısıalar qurylǵan, olar pedagogterdiń quqyqtaryn buzý boıynsha ótinishter men faktilerdi jedel qaraıdy.
