I toptaǵy múgedektigi bar adamdarǵa kútim kórsetýshilerge jańa járdemaqy túri engiziledi. Bul týraly senattyń jalpy otyrysynyń birinshi oqylymynda  eńbek jáne halyqty áleýmettik qorǵaý mınıstri Serik Shápkenov málimdedi.

Mınıstrdiń aıtýynsha, qujatta múgedektiktiń sebebine qaramastan I toptaǵy múgedektigi bar adamdarǵa kútim jasaıtyn azamattarǵa beriletin járdemaqyny engizý qarastyrylǵan.

– Qazirgi ýaqytta I toptaǵy múgedektigi bar 66 myń adamnyń árbir úshinshisi kútim járdemaqysymen de, jeke kómekshiniń qyzmetterimen de qamtamasyz etilmegen. Zań jobasyn qabyldaý nátıjesinde syrtqy qamqorlyqqa muqtaj 24 myń adam kútim boıynsha járdemaqymen qosymsha qamtylady, – dedi ol. 

Sondaı-aq  múgedektigi bar balalardyń barlyq toptary úshin járdemaqy mólsheri 16,7%-dan 37%-ǵa deıin ulǵaıtylady. Bul  30 myńnan astam múgedektigi bar balaǵa qatysty.

– Qazirgi ýaqytta múgedektigi bar balalar ata-analary ajyrasqan kezde bir mezgilde alımentter men múgedektigi boıynsha járdemaqy ala alady. Osy norma engizilgen jaǵdaıda 2 myń bala múgedektigi boıynsha járdemaqymen qatar (mólsheri 41 163 ten 48 023 teńgege deıin) asyraýshysynan aıyrylǵan jaǵdaıda járdemaqy alady (mólsheri 12 063-ten 29 500 teńgege deıin), –  dep túsindirdi Serik Shápkenov.

Sonymen qatar, mınıstr múgedektigi bar balalardy tárbıelep otyrǵan otbasylardyń balalary kámeletke tolǵannan keıin turǵyn úı kezeginde 10 jylǵa deıin turatynyn atap ótti.

Eger balanyń 18 jasqa tolǵanǵa deıin baspanasy bolmasa, onda múgedektigi bar azamat kezekke qaıta turýǵa májbúr. Bul norma 20 myńnan astam otbasyna turǵyn úı kezegin saqtaýǵa múmkindik beredi. 

Bul zań jobasy 55 mlrd teńge somasyna qajetti qarjylandyrýmen qamtamasyz etildi. Shyǵyn normalary 2021-2023 jyldarǵa bólingen qarajat sheńberinde iske asyrylady.