Qazaqstannyń bas sanıtar dárigeri Erlan Qıasov jarıalaǵan qaýlyǵa qatysty Aqtóbe qalasynyń ákimshilik sotyna aryz tústi. Bul týraly Dıapazon saıty habarlady. 

Bas sanıtar dáriger 3 qyrkúıekte jarıalaǵan qaýlyda koronavırýsqa qarsy vaksına almaǵan qyzmetkerlerdiń jumysqa barýyna tyıym salǵan. Buǵan oblystyń 3 turǵyny qarsylyqtaryn bildirip, mundaı talap durys emes jáne zańǵa qaıshy dep esepteıdi. Aryzdanýshylar bas sanıtardyń kúndizgi rejımde jumys isteýge ruqsat bermeý týraly tarmaqtardy alyp tastaýdy talap etýde.

"Aqtóbe soty Erlan Qıasovtyń Nur-Sultanda jumys isteıtinin anyqtady. Turǵyndar qarsylyq bildirgen qaýly da sol qalada shyǵarylǵan bolatyn. Demek is ol jerde qaralýy qajet. Aryz-shaǵym Nur-Sultan qalasynyń mamandyrylǵan aýdanaralyq ákimshilik sotyna jiberildi" delingen resmı habarlamada. 

Eske sala keteıik, 3 qyrkúıekte jarıalaǵan qaýlyda bas sanıtar dáriger Erlan Qıasov koronavırýsqa qarsy vaksına almaǵan qyzmetkerlerdiń 6 qyrkúıekten bastap jumysqa shyǵýyna shekteý qoıǵan bolatyn.

Bul talap turaqty medısınalyq qarsy kórsetilimderi bar, sońǵy 3 aıda koronavırýspen aýyrǵan jumysshylarǵa qatysty emes. Qaýlyda uıymdardyń naqty tizimi de kórsetilgen. Olardyń ishinde bankter, sulýlyq salondary, shashtarazdar, hımıalyq tazalaý oryndary, fıtnes, sport keshenderi, tıpografıalyq qyzmetter, tigin atelesi, fotosalondar jáne taǵy basqa halyqqa qyzmet kórsetý nysandary bar.