Óriste maly, toı-jıynda basy qosylǵan kórshiles Aqshymyraý, Qyzan aýylynyń turǵyndary úshin berekeli kúz merekeli bolyp bastaldy.
Qyzan aýylynda ashylǵan dárigerlik ambýlatorıa kópshiliktiń kóz qýanyshy da, kóńil qýanyshy da boldy. Aýdan boıynsha dárigerleri turaqty, densaýlyq saqtaý mekemesi qalyptasqan aýyl bolǵanymen turǵyndar jańa zamanaýı apparattarǵa muqtaj edi. Tıptik úlgide salynǵan emdeý orny sońǵy úlgidegi medısınalyq quraldarmen tolyq jabdyqtalǵan. Fızıokabınet, tis emdeý bólmesi, balalar bólimi men egý kabıneti, on tósektik kúndizgi jáne táýlik boıy jumys isteıtin ambýlatorıada terapevt men akýsher qulash sermep qyzmet ete alatyn jaǵdaı bar. 1982 jyly salynǵan eski emdeý ornynda kórshiles eki aýyldyń turǵyndaryna qaltqysyz qyzmet etken bilikti dárigerler Azanbek Qudaıbergenov pen Baqtyly Qonysovamen qatar 14 meıirbıke jańa nysanda qyzmetterin bastap ketken.
Sáskege taman aýyl shetindegi jańa ǵımarattyń aldyna jınalǵan halyqtyń qýanyshynda shek bolmaı, aq jaýlyqty analar shashý shashyp, aqsaqaldar jaǵy qol alysyp bir-birin quttyqtap jatty.
El úshin aq túıeniń qarny jarylǵan kún bolǵan merekeli kúnde oblys ákimi A.Aıdarbaev, oblystyq máslıhat hatshysy B.Júsipov, oblystaǵy basqarma basshylary, aýdan ákimi J.Aıtýarov, bólim, mekeme basshylary aýyl turǵyndarynyń qýanyshymen bólisti.
Nysannyń ashylý salatanatynda sóz alǵan óńir basshysy jınalǵan kópshilikti Ata zańymyzdyń 20 jyldyq mereıtoıymen quttyqtaı kelip, arnaıy quttyqtaýyn jetkizdi.
- Qurmetti aýyl aqsaqaldary, aq jaýlyqty analar sizderdi búgingi qýanyshtaryńyzben quttyqtaımyn! Sizdiń aýylda ashylyp otyrǵan jańa emdeý mekemesi sońǵy eki jylda Mańǵystaý aýylynda ashylǵan 7 ambýlatorıanyń biri bolyp otyr. Ótken aılarda Jyńǵyldy, Ushtaǵan aýyldarynyń turǵyndarynyń dál osyndaı qýanyshymen bólisken edik. Biz ashylǵan barlyq jańa nysannyń zamanaýı jabdyqtarmen qamtylýyn qadaǵalap kelemiz, bul nysanda da barlyq qajetti medısınalyq qural-jabdyqtar bar, sondyqtan sizderge sapaly medısınalyq qyzmet kórsetiletinine senemin,-dep aqjarma tilegin arnaǵan A.Serikulynyń ıyǵyna qazaqtyń dástúrimen aýyl aqsaqaly T.Nurlybaev shapan jaýyp qurmet kórsetti.
Jańa nysannyń qurylysyn júrgizgen «Elmontqurylys» JSHS dırektory S.Turjanuly sımbolıkalyq kiltti saltanatty túrde ambýlatorıanyń bas dárigeri A.Qudaıbergenovke tapsyrǵannan soń, oblys ákimi A.Aıdarbaev pen jarty ǵasyrǵa jýyq ýaqyt aýyl halqynyń alǵysyna bólengen dáriger B.Qonysova jańa nysannyń lentasyn qıdy.
Kópten kútken jańalyqtyń kýási bolǵan kópshilik emdeý ornyna qaýmalaı kirip, oblys basshysymen birge jańa nysannyń ishin aralap shyqty.
Kóp tileginiń oryndalýyna bas bolǵan óńir basshylaryna alǵystaryn aıtqan aýyl turǵyndarymen qoshtasyp kórshiles Aqshymyraý aýylyna at basyn burǵan el aǵalaryn aýyl ajaryna kórik qosqan mádenı kópshilik ortalyqtyń aldyna jınalǵan halyq qýanyshpen qarsy aldy.
Alpys jyl buryn salynyp aýyl turǵyndaryn qýantqan shaǵyn klýbtyń kúıi ketkeli qashan. Aýylǵa mádenıet úıiniń kerektigi aýyl aqsaqaldarynyń óńir basshylarynyń aldyna kópten qoıyp júrgen máseleleriniń biri edi. Másele oń sheshimin taýyp, aýyl terıtorıasynan munaı óndirip jatqan «Kommunaı» JSHS demeýshiligimen jańa mádenıet úıiniń salynýyn aýyl halqy kóp kútti. Kópten kútken qýanyshtyń ólshemi bıik boldy ma, bul aýyldaǵy halyqtyń qarasy kóp eken. Aýyl ortalyǵynan boı túzegen jańa ǵımarattyń aldyna qazaqtyń qos kıiz úıi tigilip, qýanyshty eseleı túsetin jaǵymdy áýender oınatylyp, aýyl tóri ánge bólenýde.
Buǵan deıin quny 144 mln teńge bolatyn 50 balaǵa arnalǵan balabaqsha syıǵa tartqan óndiristik mekeme 156 mln qarjy jumsap 150 kórermenge shaqtalǵan mádenı ortalyqtyń kelbetin kelistirip salyp beripti. Keń ári jaıly nysanda mádenıet qyzmetkerlerinen basqa aýyl poshtasy, kitaphana ornalaspaq. Osyǵan deıin mekteptiń bir bólmesin paıdalanyp otyrǵan poshtashylar mektep jumysyna kedergi keltiretini kóp jerde aıtylatyn. Bul máseleniń de sheshimi ońataıly tabylyp, zeınetkerler zeınetaqasyn alý úshin keń dálizde kezekke turatyn boldy.
Aýyl turǵyndaryn qýanyshqa bólegen demeýshi kompanıanyń basshysyna alǵys bildirgen A.Aıdarbaev jańa ǵımarat rýhanı azyqtyń ordasy bolsyn degen tilegin arnady. Jańa nysannyń sımbolıkalyq kiltin mádenıet mekemesiniń dırektory Q.Tyndyrǵanovqa tabystaǵan «Kommunaı» JSHS dırektory V.Dýrmanov qonaqjaı kórshilerine árqashan qol ushyn sozatynyn jetkizdi.
Aýyl turǵyndary atynan sóz alǵan eńbek ardageri D.Tileýbaı óńir basshysy men óndiris orynynyń basshysyna alǵys arnap, árqashan Beket atamyz qoldap júrsin degen tilekpen Atanyń Oǵylandydaǵy meshitiniń portretin syıǵa tartty. Aýyl jastarynyń tilegi qurylysy aıaqtalýǵa jaqyn meıramhana ǵımaratyn sport kesheni etip jasaqtaýǵa oblys, aýdan basshylarynyń qoldaýy ekenin jetkizdi.
Oblys ákimi jáne demeýshi kompanıa basshysy men aýyl aqsaqaly Q.Serikov ǵımarattyń lentasyn qıǵan soń, aýyl halqy eńseli mádenı orynnyń alǵashqy konsertin tamashalady.
Mańǵystaý aýdany ákiminiń apparaty
«Qamshy» silteıdi
