Aýǵanstannyń shyǵysyndaǵy Host provınsıasyndaǵy dinı mektepte jarylys boldy. Saldarynan 7 adam qaza taýyp, 17 adam jaralandy, dep habarlady RIA Novostı.

Aýǵanstan ýaqytsha bıliginiń ishki ister mınıstrligi dinı mektepte qol granatasy jarylǵanyn málimdedi.

Buǵan deıin osydan birneshe kún buryn Kabýldaǵy Idgah meshitinde jarylys bolǵan. Ol kezde 12 adam qaza taýyp, 32 turǵyn jaralanǵan.

İshki ister mınıstrliginiń habarlaýynsha, oqıǵadan keıin úsh adam qamaýǵa alynǵan. Bul oqıǵa boıynsha jaýapkershilikti DAISH (Qazaqstanda tyıym salynǵan uıym) lańkestik toby aldy.

Talıban ókilderi Aýǵanstan áskerine shabýyldy kúsheıtip, 15 tamyzda Kabýldy basyp alǵan. Kelesi kúni olar soǵystyń aıaqtalǵanyn habarlap, barlyq aýmaqqa baqylaý ornatqanyn jarıalady.

Tálibterden qutylýdyń sońǵy múmkindigi – Kabýl áýejaıy bolǵandyqtan turǵyndar áýejaıdyń ushý-qoný jolaǵyna basa-kóktep kirip, ushaqtarǵa otyrýǵa talpyndy.