Ǵ.Músirepov atyndaǵy Qazaq memlekettik akademıalyq balalar men jasóspirimder teatrynyń akteri Erkin Ábdireshovpen suhbat.
- Ǵ.Músirepov teatrynyń 70 jyldyq tarıhy bar. Osy turǵyda teatrymyz aýyz toltyryp aıtarlyqtaı qandaı jetistikterge jetti?
- 1944 jyly sol kezdegi Qaz SSR-niń Kabınet mınıstrliginiń jarlyǵymen osy Almatyda balalar men jasóspirimderge arnalǵan teatr ashý jóninde qaýly shyqqan. Sodan, 1945 jyly E.Shvarstyń «Qyzyl telpek» pesasymen orys trýppasy óziniń shymyldyǵyn ashty. Al, qazaq trýppasy A.Tolstoıdyń «Altyn kilt» qoıylymymen 1946 jyly ashyldy. Sodan beri talaı-talaı spektáklder qoıyldy.
Eń alǵashqy balalarǵa arnalǵan qazaq dramatýrgıasynda M.Aqynjanovtyń «Altyn saqa», «Ybyraı Altynsarın», Sh.Qusaıynovtyń «Aldar kóse», L.Sımonovanyń «Altyn dánniń qupıasy», T.Alshynbaevtyń «Kerqula atty Kendebaı» spektáklderi qoıylyp júrdi. Degenmen de balalarǵa arnalǵan naǵyz betburys 1985 jyly qazaq trýppasy óz aldyna bólinip shańyraq qurǵannan keıin bastalý kerek edi. Alaıda, sol kezdegi keńes ókimetiniń saıasaty bolar, Almatydaǵy jalǵyz №12 qazaq mektebi bolǵanymen de qazaq balalaryna arnalǵan qoıylymdar az boldy, al, negizgi baǵyty úlkenderge arnaldy.
Sol kezderi bizdiń oqý bitirip jańadan kelgen kezimiz edi. Sh.Murtazanyń «Stalınge hat», «Beseýdiń haty», Ǵ.Músirepovtiń «Aqan seri — Aqtoqty», «Mádı», «Alýa», «Qyz jıyrmaǵa tolǵanda», «Qaraly sulý» spektáklderi sol kezdiń baspasóz betterinde jazylyp, kóńilinen shyǵyp jatty.
Árıne sońǵy ýaqytta balalarǵa arnalǵan qoıylymdarǵa jıi kóńil bólinip júr.
- Bıyl teatrymyzdyń 70-shi maýsymynyń ereksheligi nede?
- Bıylǵy teatr maýsymynyń shymyldyǵyn eki qoıylymmen ashqaly otyrmyz. Elbasy N.Á.Nazarbaevtyń sózi bar: «Balalar — bizdiń bolashaǵymyz», — deıdi. Sondyqtan, balalarǵa arnalǵan qoıylymdarǵa bet buramyz.
Al, ereksheligi – balalarǵa arnalǵan spektáklder. Jeke óz aldyna teatr maýsymyn ashyp berip, qýantý nıettemiz. Teatr repertýarynda balalarǵa arnalǵan qoıylymdar sany 10 shaqty, endi solardyń sanyn kóbeıtý kerekpiz.
Bıyl birinshi ret balalarǵa arnalǵan qoıylymmen ashqaly otyrmyz. «Altyn múıizdi kıik» — qazaq ertegisiniń jelisi arqyly búgingi kúnge úılestirilgen qoıylym(avt men rej. E.Ábdireshov). Sondaı-aq M.Maqataevtyń «Raıymbek! Raıymbek!» poemasyna ınsenırovka jasalyndy. Qoıylym rejıseri – M.Ahmanov. Odan keıin Ǵ.Músirepovtiń Qoıandy jármeńkesi týraly jazylǵan «Maıra» shyǵarmasy bar. Munda Qalıbek Qýanyshbaev, Qajymuqan Muńaıtpasov, Maıra Ýálıqyzy, Ǵabıt Músirepov sıaqty tulǵalar estelikke alynyp jazyldy.
- Qazaq handyǵynyń 550 jyldyǵyna arnalǵan M.Maqataevtyń «Raıymbek! Raıymbek!» qoıylymy kezekti teatr maýsymynyń premerasy retinde kórermenge usynylmaq. Osy jóninde ne aıtasyz?
- Bıyl Elbasynyń jarlyǵymen «Qazaq handyǵynyń 550 jyldyǵy» toılanyp jatyr. Ony bizdiń teatrlardyń ishinde eń alǵashqylardyń biri bolyp, T.Ahtanovtyń «ANT» spektaklin rejıser J.Hadjıevtiń sahnalaýynda jyldyń basynda kórermenge tartý etti. Endi, sonyń jalǵasy retinde, toılanyp jatqan úrdisti odan ary qaraı jalǵastyryp, M.Maqataevtyń «Raıymbek! Raıymbek!» poetıkalyq dastanyn teatrdyń kórkemdik jetekshisi Murat Ahmanov kórermenge usyný maqsatynda jumys istep jatyr. Munda Aqtaban shubyryndy, Alqakól sulama syndy qazaqtyń basyna kelgen náýbet kezeńder kórsetiledi.
- Teatr jańa býyn ártisterimen tolyǵyp jatyr. Olarǵa qanshalyqty senim arta alasyzdar?
- Biz de kezinde osy teatrǵa jas bolyp kelgenbiz, ınstıtýt qabyrǵasynda ustazdarymyzdyń bergen bilimderin shama-sharqynsha oqyp, osy teatr degen mektepte tárbıelendik. Teatrdyń óz mektebi bolady. Daryn degendi ınstıtýt qabyrǵasynda kózin ashatyn bolsa, teatrda odan ary shyńdaıdy.
Kelip jatqan jastar shetterinen daryndy, ary qaraı jumys isteý ujymǵa, rejıserge baılanysty deımin. Bıyl bitirgen jastarmen jumys jasap jatyrmyn. Betalystary jaman emes, jatpaı-turmaı jumys jasaý ústindemiz.
- Áńgimeńizge rahmet.
Gúlnaz Ádilǵalıqyzy
