Túrkıa prezıdenti Rejep Taıyp Erdoǵan 10 memlekettiń elshisin "persona non grata" dep jarıalap, elden shyǵarýdy buıyrdy. Bul týraly RIA Novostı habarlady.
Basylymnyń jazýynsha, Túrkıadan AQSH, Kanada, Fransıa, Fınlándıa, Danıa, Germanıa, Nıderland, Jańa Zelandıa, Norvegıa, Shvesıa sekildi elderdiń elshileri shyǵarylady.
– Túrkıanyń Syrtqy ister mınıstrligine kelip, bizge buıryq berýge bolmaıdy. Osy máselege qatysty Syrtqy ister mınıstrine dereý shara qoldaný kerektigin aıttym. Iaǵnı atalmysh 10 elshini "persona non grata" (elge kirýine tıym salynǵan sheteldik saıasatker – red) dep jarıalaýdy tapsyrdym, – dedi Túrkıa prezıdenti Eskıshehır qalasynda sóılegen sózinde.
Al bul elderdiń dıplomattary narazylyq sherýlerin qarjylandyrdy dep aıyptalǵan quqyq qorǵaýshy Osman Kavalany bosatýdy talap etken. Oǵan 2016 jylǵy memlekettik tóńkeriske qatysy bar degen de aıyp taǵylǵan bolatyn.
Osman Kaval quqyq qorǵaýshy ári etnıkalyq jáne dinı azshylyq toptaryn qoldaıtyn Anadolu Kültür AŞ mádenı qorynyń negizin salýshy. Ol 2013 jyly Stambýldyń Gezı saıabaǵyndaǵy narazylyq sherýine (úkimetti bılikten ketirýge talpyný áreketi-red) qatysty is boıynsha aıyptalyp, 2020 jyldyń aqpan aıynda aqtalyp shyqqan.
Alaıda Stambýl prokýratýrasy sol kúni ony qaıta qamaýǵa alýǵa order bergen. Bul joly Osman Kaval 2016 jyly elde memlekettik tóńkeris jasaýǵa qatysty dep aıyptalǵan. Sodan beri ol qamaýda otyr.
Pikir qaldyrý