Keler aıdyń sońynda elde 12 jasqa tolǵan balalarǵa koronavırýsqa qarsy ekpe salyna bastaıdy. Bul týraly densaýlyq saqtaý mınıstrliginiń ókilderi habarlady.

12 jasqa tolǵan balalarǵa koronavırýsqa qarsy ekpe salý úshin elge arnaıy Pfizer kompanıasynyń vaksınasy ákelinedi. Ekpe medısınalyq mekemelerde ǵana salynady. Onyń ózinde ata-analar balasyna ekpe saldyrýǵa jazbasha túrde ruqsat berýi tıis.

Ekpe salmas buryn ár balanyń densaýlyǵy tekseriledi. Vaksınanyń dozasy 0,3 mıllılıtr. Aq halattylardyń sózinshe, qan aýrýlary, sal aýrýyna shaldyqqan, Daýn sındromy bar jasóspirimderge de vaksına saldyrýǵa bolady.

– Balalar tek qana tasymaldaýshy bolady eken, olarda koronavırýs jeńil ótedi eken degen taǵy bir túsinik bar. Balanyń aǵzasyna vırýstyń kóp dozasy tússe, ol aýyr deńgeıde ótýi múmkin. Halyq arasynda durys túsinik bolýy qajet. Bul vaksına balalarymyzdyń densaýlyǵyna koronavırýstyń zardabyn tómendetedi, – deıdi DSM Qoǵamdyq densaýlyq saqtaý UO basqarma tóraǵasynyń orynbasary Aınagúl Qýatbaeva.

Buǵan deıin úkimet otyrysynda densaýlyq saqtaý mınıstri Alekseı Soı Qazaqstanda koronavırýstyń taralýy boıynsha aldaǵy úsh aıǵa arnalǵan jańa boljam jarıalaǵan edi.