Aldaǵy ýaqytta júrgizýshi kýáligin alýǵa arnalǵan emtıhandarda bıometrıalyq sáıkestendirý júıesi jumys isteıdi. Bul týraly sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın onlaın brıfıńte málim etti.

Onyń aıtýynsha, mamandandyrylǵan HQKO-larda júrgizýshi kýáligin emtıhansyz alý faktileri bar. Osyǵan baılanysty synaqqa keletin adamdy tekserý sharalary kúsheıtiledi. 

– Aldaǵy ýaqytta júrgizýshi kýáligin alýǵa arnalǵan emtıhandarda bıometrıalyq sáıkestendirý júıesin engizý josparda bar. Atap aıtqanda, teorıalyq emtıhanǵa kirerdiń aldynda jáne emtıhan ústinde tekseris jasalady. Budan bólek, praktıkalyq emtıhanda da týra sondaı tekseris bolady, – dedi Mýsın ortalyq komýnıkasıalar qyzmetinde ótken onlaın brıfıńte.

Baǵdat Mýsın sońǵy ret 24 qazanda elordadaǵy mamandandyrylǵan halyqqa qyzmet kórsetý ortalyǵynda bolyp, sybaılas jemqorlyq kórinisterin anyqtaǵanyn atap ótti.

– Qazirgi kezde biz tıisti sharalardy qolǵa alyp jatyrmyz. Tosqaýyl qoıyldy. Máselen keshe Nur-Sultan qalasyndaǵy halyqqa qyzmet kórsetetin mamandandyrylǵan ortalyqta úsh adam ǵana júrgizýshi kýáligin aldy. Bul degenimiz, baqylaý kúsheıtildi. Qosymsha adamdardy qoıdyq. Olar emtıhanǵa kiretin adamdardy tekserip otyrady, – dedi Mýsın.