Búgin Shymkent qalasynyń qalalyq orta sapasy jáne baqylaý basqarmasynyń basshysy Ǵalymjan Ýtenbaev @akimat_shymkent ınstagram paraqshasynda ótken tikeleı̆ efır barysynda turǵyn úılerde gaz jabdyqtaryn qaýipsiz paıdalaný týraly túsindirip ótti.

Onyń aıtýynsha, qala aýmaǵynda ortalyq gaz júıesine qosylǵan 192 780 abonent bar eken. Onyń ishinde 85 243 abonent kópqabatty turǵyn úıler, 100 362 abonent jeke sektor, 363 abonent óndiristik kásiporyndar jáne áleýmettik nysandar jáne 6 812 abonent turmystyq sharýashylyq mekemeler.

Turǵyndarǵa gazdy paıdalanýda qaýipsizdik sharalaryn saqtaý boıynsha úgit-nasıhat túsindirý jumystary turaqty túrde júrgizilip keletinin aıtqan basqarma basshysy jyl basynan beri sala mamandarymen 22 myń dana habarlama taratylǵanyn atap ótti.

«Búgingi tańda, úgit-nasıhat túsindirý jumystaryn júrgizý barysynda, 186 myń gaz paıdalanýshylardan 107 myń (58 %) ishki gaz júıelerine qyzmet kórsetýshi mekemelermen kelisim shartqa turǵan. QR «Gaz jáne gazben jabdyqtaý týraly» Zańynyń 19 babynyń 3 tarmaqshasyna sáıkes, turǵyndar turmystyq gazdy paıdalaný barysynda atestattalǵan, mamandandyrylǵan mekemelermen (VDGO) ózderine tıesili gaz júıelerine tehnıkalyq qyzmet kórsetýge arnalǵan shart jasasýǵa mindetti»,-dedi Ǵ.Ýtenbaev.

Aıta keteıik, ótken 2020-2021 jyldyń jylytý maýsymynda qala boıynsha gazben baılanysty kóptegen oqys-oqıǵalar tirkelgen bolatyn. Onyń ishinde uly gazben ulanyp 8 adam qaıtys bolǵan, olardyń arasynda kishkentaı balalar da bar. Sala jetekshisi atalǵan oqıǵalardyń basty sebebi, turǵyndardyń tehnıkalyq talaptardy saqtamaýy, atap aıtqanda óz betinshe gazdy tutyný qurǵylaryn ornatýy, lodjıaǵa shyǵarýy jáne jeldetkish kanaldaryn murja retinde paıdalanýy.