Shymkent qalasy boıynsha «Nurly jer» baǵdarlamasy aıasynda 500 mln. teńgege turǵyn úı sertıfıkatyn berý jalǵasady. 2021 jyldyń 1 qazanynan bastap bastap tólem qabiletin rastaǵan jáne banktiń ıpotekalyq qaryz shartyn maquldaý týraly hatyn alǵan azamattardan ótinish pen qujattar qabyldaý jumystary júrgiziledi.

Turǵyn úı sertıfıkattaryn múgedek balalary bar nemese múgedek balalardy tárbıelep otyrǵan, kópbalaly, tolyq emes otbasylar ala alady. Sondaı-aq, memlekettik mekemeleri men memlekettik kásiporyndarynyń, densaýlyq saqtaý, bilim berý, mádenıet, sport salasynyń mamandary, quqyq qorǵaý organdarynyń qyzmetkerleri jáne memlekettik qyzmetshiler de bul jeńildikten úmitti.

Turǵyn úı sertıfıkaty «Nurly jer» memlekettik baǵdarlamasy aıasynda 1 mıllıon teńgege deıin mólsherde memleket tarapynan bastapqy jarna mólsheriniń bir bóligin jabý úshin usynylady. Qatysýǵa nıet bildirgen tulǵa sońǵy 6 aıda otbasynyń jıyntyq tabysy onyń árbir múshesine shaqqanda 106336,2 teńgeden aspaǵan jaǵdaıda jáne turǵyn úı satyp alýǵa ıpotekalyq turǵyn úı qaryzyn berý týraly banktiń maquldaǵan haty arqyly turǵyn úı sertıfıkatyna ótinim jibere alady.

Turǵyn úı sertıfıkatyna ótinimder «kezekte.kz» ınternet resýrsy arqyly onlaın qabyldanady. Bul úshin árbir azamattyń jáne onyń kámeletke tolǵan otbasy músheleriniń elektrondy sıfrlyq qoltańbasy (ESQ) bolýy qajet. Aıta ketý kerek, búginde 132 azamat turǵyn úı sertıfıkatynyń ıegeri atanyp, memlekettik kómekke ıe bolǵan.