QR Prezıdenti Qasym-Jomart Toqaevtyń buqaralyq sportty damytý boıynsha bergen tapsyrmasy negizinde Shymkent qalasy ákiminiń qoldaýymen «Shymkent Jastar Lıgasy» jobasy qolǵa alynǵan. Ekinshi ret ótetin sporttyq is-shara osy jyldyń qazan aıynda bastalyp 2022 jyldyń mamyr aıynda aıaqtalady dep josparlanýda. Bul týraly búgin aqparattyq-kommýnıkasıalyq ortalyǵynda ótken brıfıń barysynda bilim basqarmasynyń basshysy J.Tájıeva málim etti.

«Jastardyń bos ýaqytyn tıimdi paıdalaný, jappaı sportqa baýlı otyryp salaýatty ómir saltyn nasıhattaý, buqaralyq sportty damytý maqsatynda ekinshi márte uıymdastyrylyp otyrǵan «Shymkent jastar lıgasy» jobasy fýtbol, voleıbol, basketbol, shahmat syndy sporttyń 4 túrinen joǵary jáne orta arnaýly oqý oryndarynyń jastary jáne jalpy bilim berý mekemeleriniń oqýshylary arasynda ótkizý josparlanýda»,-dedi basqarma basshysy.

Atalmysh jobaǵa jalpy bilim berý mekemelerdiń tarapynan qazirgi ýaqytta fýtbol (uldar arasynda), basketbol (uldar arasynda), voleıbol (qyzdar arasynda), shahmat (uldar, qyzdar arasynda) sport túrlerinen 143 mektepten ótinim kelip túsken.

Sonymen qatar, joǵary jáne orta arnaýly oqý oryndarynan 37 komanda onyń ishinde 7 joǵary oqý oryndary jáne 30 orta arnaýly oqý oryndary jasaqtalyp, qatysýǵa ótinish berdi.Stýdentter arasyndaǵy jarys bólek ótedi.

«Shymkent jastar lıgasy» jobasy joǵary jáne orta arnaýly oqý oryndary úshin qazan aıynan bastalyp, jeltoqsan aıyna deıin jalǵasady.

Atalǵan jobanyń birinshi kezeńi osy jyldyń naýryz aıynda bastalyp, maýsym aıynda aıaqtalǵan bolatyn. Mektep oqýshylary arasynda úsh aıǵa sozylǵan aýqymdy sporttyq saıystyń jeńimpazy atanǵan 4 mektepke 20 mln teńgeden qarjylaı syılyq berilgen. Oqýshylar bul qarjyny ózderi bilim alatyn mekteptiń materıaldyq-tehnıkalyq bazasyn nyǵaıtý maqsatynda ár mektep 12 dana jyljymaly ınteraktıvti panel alǵan.

Birinshi kezeńde 140 bilim berý uıymynan 500-den astam komanda jasaqtalyp, 6 myńnan astam oqýshy baǵyn synaǵan.