Bıyl Shymkent qalasy boıynsha «Baqytty otbasy» baǵdarlamasyna bastapqy bólingen lımıt kórsetkishi 373 bolǵan edi. Azamattardy turǵyn úımen qamtý máselesin ońtaıly sheshý maqsatynda atalǵan lımıt kólemi qazirgi tańda 589-ǵa ulǵaıǵan.

Onyń ishinde kópbalaly otbasylar sany – 255, múgedek bala asyraýshy otbasylar – 285, tolyq emes otbasylar – 49.

Shymkent qalasynda «Nurly jer» memlekettik baǵdarlamasy aıasynda «Baqytty otbasy» baǵyty arqyly nesıelik negizde joǵaryda bólingen 589 lımıtke sáıkes, búginde 127 azamat baspanaly boldy. «Baqytty otbasy» baǵytynyń sharttary men talaptaryna sáıkes azamattar páterdi jańa jáne ekinshi naryqtan ózderi izdep tapqan. Budan bólek, búginde atalǵan baǵyt boıynsha konkýrstan ótken 400-den asa qatysýshy ózderiniń tólem qabilettilikterine sáıkes turǵyn úı izdeý ústinde.

«Baqytty otbasy» baǵytynyń negizgi qatysýshylary – turǵyn úı kezegindegi «Altyn alqa», «Kúmis alqa» alqalarymen marapattalǵan nemese buryn «Batyr ana» ataǵyn alǵan, sondaı-aq İ jáne İİ dárejeli «Ana dańqy» ordenderimen marapattalǵan kóp balaly analar, tolyq emes otbasylar, múgedek bala tárbıelep otyrǵan otbasylar.

Aıta ketý kerek, baǵdarlama elimizdegi az qamtylǵan otbasylardyń jyldyq 2 %-dyq mólsherlememen turǵyn úı alýǵa múmkindik berýde.

Shymkent qalasy boıynsha 2021 jylǵa bólingen lımıttiń aıaqtalýyna baılanysty azamattar «Baqytty otbasy» baǵdarlamasyna keler jyly «Otbasy bank» arqyly qatysa alady.