29 jastaǵy er adam Qaraǵandyda jeke kompanıa dırektoryna tapanshadan oq atqan, dep habarlady Polisia.kz saıty.

Qaraǵandy qalasy polısıa basqarmasy Ortalyq polısıa bólimine saýda kásiporyndarynyń birinde qarýly qaqtyǵys bolǵany týraly aqparat túsken.

30 jastaǵy kásiporyn dırektory belgili bir adammen janjal bolǵanyn aıtady. Janjal barysynda kúdikti kompanıa basshysyna "Osa" travmatıkalyq tapanshasynan oq atqan. Jábirlenýshi jaraqattanyp, medısına mekemesine júgingen. Biraq aýrýhanaǵa jatýdan bas tartqan.

Polısıa qyzmetkerleri 29 jastaǵy er adamdy izin sýytpaı ustaǵan. Travmatıkalyq tapansha tárkilenip, kúdikti óz kinásin moıyndaǵan.

Atalǵan jaıt boıynsha qylmystyq kodekstiń 287-baby "Qarýdy zańsyz saqtaý nemese alyp júrý" boıynsha qylmystyq is qozǵalyp, tergeý amaldary júrgizilýde.