Óskemende kómir kezeginde birneshe kún turǵan 30 jastaǵy er adam kezekti jyljytý úshin "ózin-ózi órteımin" dep qorqytqan. Bul týraly qumash_kz telegram kanaly habarlady. 

Belgili bolǵandaı, birneshe kún kezekte turyp, qara otynǵa qol jetkize almaǵan Ulan aýdanynyń turǵyny óziniń júk kóligimen joldy jaýyp, benzın shashyp, ózin órtep jiberemin dep shý shyǵarǵan.

"Polısıa qyzmetkerleri er adamnan kanıstrdi alyp, ony tynyshtandyrdy. Ol mundaı áreketke, kómir ala almaǵany úshin barǵan. Qaqtyǵysty retteýge atsalysqan baza basshylyǵy men ákimdik ókili oǵan kómir berý týraly sheshim shyǵardy. Kezekte turǵandar qarsy bolmady" delingen polısıa departamentiniń baspasóz qyzmetinde. 

Al joldy bógep, basqa kólik quraldarynyń qozǵalysyna kedergi keltirgeni úshin oǵan 10 AEK kóleminde (29 170 teńge) aıyppul salyndy.

Jylytý maýsymy bastalǵaly Qazaqstannyń kóptegen óńirlerinde kómir tapshy. Buǵan deıin Almaty oblysy Saryózek aýylynda belgisiz áıel kómir úshin júk tıegish-ekskavatordyń kovyshyna minip alǵan. 

Bıyl elde kómirdiń baǵasy 5 paıyzǵa qymbattaǵan. SHQO-da baǵanyń ósýi birden 11 paıyzdy qurasa, ońtústik óńirlerde 7 paıyzǵa jetken.