Bıyl Shymkent qalasynda turǵyn úılerdi modernızasıalaýǵa 1,3 mlrd teńge qarjy bólinip, 11 turǵyn úıge aǵymdaǵy, 25 úıge kúrdeli jóndeý jumystary júrgizildi.

Bul jóninde qala ákimi Murat Áıtenov «Ákim saǵaty» baǵdarlamasynda aıtty.

«Tozyǵy jetken úıler renovasıa baǵdarlamasy arqyly sheshimin tabady. Baǵdarlamanyń maqsaty – avarıalyq turǵyn úılerdiń artýyna jol bermeý jáne jańa qalalyq ortany qalyptastyrý. Ony iske asyrý kezinde jaıly turýǵa, demalýǵa jáne jumys isteýge beıimdelgen, aralas fýnksıasy bar qalalyq ortanyń Jańa josparlaý qurylymyn qurý; energıalyq tıimdi kóppáterli turǵyn úılerdi salý, olardy paıdalaný shyǵyndaryn azaıtý; ekologıalyq jaǵdaıdy jaqsartý; ınjenerlik ınfraqurylymdy jańartý jáne jańǵyrtý; Shymkent qalasynyń qazirgi zamanǵy sáýlettik kelbetin qalyptastyrý kózdelip otyr» - dedi ákim.

Sonymen birge, qala turǵyndaryn kóp qabatty turǵyn úılerge arnalǵan jańa basqarý júıesine ótýge shaqyrdy. Jaı seriktestik nemese páter ıeleriniń birlestigin qurý arqyly turǵyn úıdiń tazalyǵyn, jóndeý jumystaryn sheship, ortaq múlikke jaýapkershilikpen qaraýǵa múmkindik týatynyn aıtty.