8-shi TAPSYRMA

QR Úkimeti 2012 jyldyń sońyna deıin:

- «Samuryq-Qazyna» ulttyq ál-aýqat qorymen birlesip, aksıonerlendirilgen ult­tyq kompanıalarǵa júıeli túrde aldyn ala ekonomıkalyq jáne zańgerlik aýdıt júr­gizýdi, olardyń nátıjelerin áleýetti mınorıtarıılerge jetkizýdi qarastyra otyryp, «halyqtyq İRO-nyń» tuńǵysh tájirıbesine keń kólemdi taldaýlar júrgizetin bolsyn;

- medıasıa ınstıtýtyn damytýǵa baǵyt­talǵan zań aıasyndaǵy quqyqtyq bazanyń

qabyldanýyn qamtamasyz etsin;

- daýlar men janjaldardy sottan tys retteýdiń osy tetikterin damytý maq­sa­tyn­daMedıatorlardyń ulttyq konferensıasyn ótkizýge bastamashylyq etsin.

Tórtinshiden, kásiptik odaqtar ınstıtýttaryn jańǵyrtýdy júrgizý kerek.

Memlekettiń eńbek qatynastaryn jetildirý máselelerindegi negizgi áriptesteriniń biri - kásipodaqtar. Sonymen birge eń irgeli kásipodaq or­talyǵy - Qazaqstan kásiptik odaqtar federa­sıasynyń (QKF) qazirgi qyzmet pishini ýaqyt talabyna sáıkes kelmeıdi, óıtkeni ol «keńestik úlginiń» salalyq qaǵıdaty boıynsha qurylǵan.

Kásiptik odaqtar týraly tıimdiligi tómen zańnama eleýli túıindi másele bolyp tabylady. Onda ujymdyq sharttar, taraptardyń olardy oryndaýǵa jaýaptylyǵy týraly qaǵıdalar onsha dál baıan etilmegen.

Sondyqtan qazir kásipodaqtar qozǵalysyn, eń aldymen  QKF-ny, jańǵyrtý jóninde batyl qadamdarǵa barýǵa týra keledi.  

9-shy TAPSYRMA

QR Úkimeti 2012 jyldyń aıaǵyna deıin  kásiptik odaqtar týraly zańnamany keshendi taldaýdan ótkizsin jáne ony ózgertý jónindegi zań jobasyn jasasyn.

3. Ómir sapasynyń qazaqstandyq úlgi-qalyby

Men Qazaqstandaǵy áleýmettik jańǵyrtý bárinen buryn barlyq qazaqstandyqtardyń ómir sapasyn arttyrýǵa, kedeılerdiń sanyn azaıtýǵa jáne áleýmettik dúbáralyqqa jol  bermeýge baǵyttalýy kerek degen senimdemin.

2020 jylǵa qaraı ekonomıkanyń ósýi ǵana emes, áleýmettik qurylymnyń aýqymdy ózgerýi oryn alatyndyqtan da bul óte  mańyzdy. Atap aıtqanda, İJÓ-degi shaǵyn jáne orta bıznestiń úlesi 40 paıyzdy quraıdy. Eńbekpen qamtylý qurylymynda bilikti mamandardyń  úlesi de 40 paıyzǵa jetedi.

Basqasha sózben aıtqanda, elde jappaı orta  tap qalyptasýda.

Búginde Qazaqstanda ómir sapasynyń belgili bir áleýmettik úlgi-qalyptaryn, sonyń ishinde memleket kepildik etetinderin de, belgileý úshin tıisti áleýet te, ekonomıkalyq  alǵysharttar da bar.

Bul oraıda men árbir qazaqstandyq ózinen bas­taýy  kerek: óziniń úıinen, qalasynan, aýylynan bas­taýy, óziniń densaýlyǵy men ómir súrý salty týraly oılanýy kerek ekenin basa aıtqym keledi. Munsyz eshqandaı jańa ómir sapasy ornamaq emes.

Árbir aýyl men qala tazalyqtyń, kór­keıý­diń, tártiptiliktiń úlgisine aınalýy kerek. Qolda bardy saqtap, kóbeıte berý úshin árbir qa­zaqstandyq eńbekqor ári quntty qojaıyn bolýy jón.

Áıtpese, mysaly, Eýropa nege baı turady? Óıtkeni ondaǵylar atam zamannan beri qunt­tylyq ónerineúırengen. Al bizde bolsa áıteýir kóz qylyp júre bergileri keledi. Mundaıda qunttylyq qaıdan bolsyn!

Áleýmettik dúbáralyqqa jol bermeý jáne ómir sapasyn udaıy arttyrý úshin áleýmettik úlgi-qalyptar men kepildikter týraly tıisti zańnamany jasaý jón.

Mundaı zań eń aldymen ómir sapasynyń negizdelgen eń az túıindi ólshemderi men kórset­kish­terin qamtýy kerek, oǵan jalaqynyń, zeınetaqy men járdemaqylardyń deńgeıi, kepildi medı­sı­nalyq qyzmettiń aýqymy, ár qa­zaq­standyqqa shaq­qandaǵy tómengi tutyný kár­zeń­kesin qalyptastyrý tetigi, taǵy basqalary qo­sylýy jón.

Ómir sapasynyń qazaqstandyq úlgi-qalyby barlyq jerde - iri qalada da, alystaǵy aýylda da oryndalýǵa tıis.

Áleýmettik  úlgi-qalyptyń ólshemderin oryndaý úshin otandyq bıznestiń ǵana emes, Qazaqstanda jumys isteıtin sheteldik bıznestiń de jaýapkershiligin arttyrý kerek.

Zań shyǵarýshylar bul úshin tıisti quqyqtyq shek-sheńber jasaýy qajet. Bıznestiń jekeshe túri óziniń «zańdaryn» belgileýge quqyq ber­meı­di. Sondyqtan da laýazymdy tulǵalardyń, jumys berýshilerdiń bul úlgi-qalyptardy saqtaý úshin jaýapkershilik deńgeıin zań júzinde aı­qyndaý mańyzdy.