Almatyda el Táýelsizdiginiń 30 jyldyq mereıtoıyna oraı alǵash ret ózge ulttan shyqqan ımamdar arasynda «Til – dostyq kópiri» atty ıntellektýaldy bilim saıysy ótti.

Jetisý aýdanyna qarasty «Abaı Qunanbaıuly» meshitinde ótken saıysty QMDB Almaty ókildigi uıymdastyrsa, maqsaty – ózge ult ókilderinen bolǵan din qyzmetkerleri arasynda qazaq tiliniń mártebesin kóterý, til tazalyǵy men sóz ónerin nasıhattaý.

Tartysty ótken saıysta jazýshy, kınodramatýrg Smaǵul Elýbaı, QMDB Tóraǵasynyń orynbasary, naıb múftı Kenjeáli Myrzabaev, fılologıa ǵylymdarynyń kandıdaty, QMDB Ǵulamalar keńesiniń múshesi Tóreáli Qydyr, PhD doktor Tımýr Ákimhanuly jáne Almaty qalasynyń bas ımamy Tólebı Ospan qazylyq etti.

Saıysqa Almaty qalasyndaǵy meshitterde qyzmet etetin ózbek, sheshen, tájik, uıǵyr, dúngen ultynan shyqqan 21 ımam qatysty. S.Elýbaıdyń «Aq boz úı» kitabynyń mazmunyn aıtyp berý, 7 taqyrypta maqal-mátelderdi jatqa aıtý jáne saýattylyq saıysy (qazaq tilinde dıktant) kezeńderi boıynsha ótken saıysta top jarǵan din qyzmetkerleri qarjylaı júldelermen marapattaldy.

«Sizder, eldi birlikke bastap júrgen azamatsyzdar. Jastar sizderge qarap boı túzeıdi. Qazaq tilin damytý maqsatynda ótip jatqan saıys – memlekettik tilge kórsetilgen qurmet. Almaty qalasynyń bas ımamy uıytqy bolǵan bul sharanyń mańyzy zor dep sanaımyn» dedi jazýshy S.Elýbaı. Sonymen qatar qalamger óziniń týyndysyn ımamdardyń oqyp, osy roman boıynsha saıysqa túsip jatqandyǵyna rızashylyǵyn bildirdi.

«Bas múftı Naýryzbaı qajy Taǵanulynyń bastamasymen júzege asyrylyp kele jatqan 7 baǵyttyń biri – din men dástúr. Imamdar arasyndaǵy bul saıys qazaq tiliniń mártebesin jáne din men dástúr sabaqtastyǵyn dáripteýge baǵyttalǵan. Barsha ımamdarymyzǵa Alla jar bolǵaı» dedi naıb múftı Kenjeáli Qońyratbaıuly.

Tildik bilim deńgeıi men sóz ónerinde erekshe kózge túsken Naýryzbaı aýdanyna qarasty «Nur» meshitiniń ustazy Muhammedámın qarı Basıev bas júldeni qanjyǵasyna baılap, Umra qajylyǵyna joldama aldy.

I oryndy ıelengen Alataý aýdanyndaǵy «Nur» meshitiniń naıb ımamy Abdrahman Sultanov 100 000 teńge qarjylaı syıaqyny jeńip alsa, II oryn Medeý aýdanyndaǵy «Fatıma» meshitiniń azanshysy Muhammedjan Rasýlmetovke buıyryp, 70 000 teńgeni qanjyǵasyna baılady. Al III orynǵa taban tiregen Alataý aýdanyna qarasty «Nur» meshitiniń naıb ımamy Bahram Asanovqa 50 000 teńge berilse, saıysta belsendilik tanytqan ózge 5 ımamǵa 10 000 teńgeden yntalandyrý syılyǵy tabystaldy. Odan bólek saıysqa qatysýshy barlyq ımamǵa qarjylaı syıaqy úlestirildi.

Alǵash ret ótkizilgen saıys jóninde Almaty qalasynyń bas ımamy Tólebı Ospan: «Saıysty ótkizýdegi basty maqsat – qazaq tili men salt-dástúrdi dáripteý. Sonymen qatar ózge ult ókilderinen bolǵan ımamdarymyzdyń qazaq tilinde erkin sóılep, jamaǵatpen jaqyn aralasý deńgeıin kóterý jáne qazaq tiliniń qoldanys aıasyn keńeıtý. Bul shara óz jalǵasyn tabady degen senimdemiz» dep atap ótti.

Bilim saıys Almaty ortalyq meshitiniń YouTube arnasynan tikeleı efırde kórsetildi. Saıys qatysýshylary aldaǵy ýaqytta da osyndaı ıgi bastama arqyly dinge qyzmet, ultqa, qazaq tiline qurmetti kúsheıtetin joba jalǵasyn tapsa eken degen tilekpen tarqasty.