AQSH memlekettik hatshysy Antonı Blınken men Fransıa syrtqy ister mınıstri Jan-Iv Le Drıan Reseı armıasynyń Ýkraına shekarasyndaǵy áreketine qatysty sóılesti.

"Eki bas dıplomat Reseıdiń Ýkraına mańyndaǵy áskerı áreketteri týraly talqylady, sonymen qatar Ýkraınanyń egemendigi men aýmaqtyq tutastyǵy týraly sóılesti" dedi AQSH memlekettik departamentiniń baspasóz hatshysy Ned Praıs.

Orys áskeriniń Ýkraına shekarasyna jaqyndaǵanyna baılanysty AQSH pen Eýroodaq dabyl qaǵýda.

Al germanıalyq DW basylymy "Reseı armıasynyń qozǵalysy yqtımal shabýyl qaýpin týdyrdy" dep jazady.

Buan deıin Ýkraına prezıdenti Vladımır Zelenskıı shekaralyq aımaqta 100 myńǵa jýyq reseılik sarbaz bar ekenin málimdegen. Osy aptanyń basynda AQSH prezıdenti Djo Baıden men Eýrokomıssıa tóraǵasy Ýrsýla fon der Leıen Reseıdiń Ýkraına mańyndaǵy áskerı kúshterin arttyrý máselesin talqylaǵan. Keıinirek Leıen EO sheneýnikteri Ýkraınanyń aýmaqtyq tutastyǵyn tolyq qoldaıtynyn aıtty.

Nazardy aýdarý tehnıkasy

Reseıdiń Ýkraına shekarasyna ásker jiberýi men Belarýs- Eýroodaq shekarasyndaǵy mıgranttardyń jınalýy bir ýaqytta bolyp jatyr. Batys mıgranttar daǵdarysyna Reseıdi kinálaıdy. Jeksenbi kúni AQSH "Belarýstiń shekaraǵa mıgranttardy jiberýi qaýipsizdikke qater tóndiredi, jikke bóliný týǵyzady" dep málimdedi. AQSH tarapy "Belarýstiń áreketi Reseıdiń Ýkraınamen shekaradaǵy áskerı qozǵalysynan nazardy bólýdi maqsat etedi" dep málimdegen.