Shymkent qalasy ákiminiń tapsyrmasyna sáıkes, Erǵalı Bilisbekov múmkindigi shekteýli azamattardyń áleýmettik qorǵalýy men baspanamen qamtý jóninde onlaın qabyldaý ótkizdi.

Jeke ótinishin jetkizgen azamattardyń biri jasy 90-ǵa taıaǵan keıýana. Ájeı múmkindigi shekteýli azamattarǵa áleýmettik qoldaý, qarıalardyń shıpajaılarda em qabyldaýy men basqa da ózekti máseleler boıynsha usynysyn bildirdi.

Erǵalı Dáýletbekuly óz tarapynan barlyq ótinishin muqıat tyńdap, tıisti basqarma basshylaryna zań aıasynda sheshý joldaryn tapsyrdy.

Qabyldaýda múgedek bala tárbıeleýshi otbasy men múmkindigi shekteýli jandar da turǵyn úı máselesin jetkizdi. Aýyr dertke ushyraǵan eki balanyń anasy baspanaǵa qol jetkize almaı júrgenin aıtady. Qala basshysynyń orynbasary zań talaptaryna saı oǵan barlyq qoldaý kórsetilip, aldaǵy ýaqytta jaǵdaıdy ózi baqylaýda ustaıtynyn aıtty.

-Úkimet tarapynan muqtaj jandarǵa áleýmettik qoldaý qarastyrylǵan. Shyn muqtaj bola tura alaqan jaıýǵa uıalatyn jandardy baıqap otyrmyn. Máselelerdi jan-jaqty qarastyryp, olarǵa qandaı kómek qajet bolsa da barynsha qol ushyn sozýǵa tyrysamyz. Tabysy tómen azamattarǵa azyq-túlik, ataýly áleýmettik kómek kórsetiledi. Barlyǵy da zań aıasynda,-dedi Erǵalı Bilisbekov.

Jalpy, turǵyn úı jáne áleýmettik kómek boıynsha qala basshysy orynbasarynyń qabyldaýyna 20-ǵa jýyq azamat jazylǵan. Qazirgi tańda, Shymkent qalasy boıynsha turǵyn úı alý kezeginde 16 myńǵa jýyq halyqtyń áleýmettik jaǵynan álsiz toby sanatyndaǵy jandar tirkelgen. Qaladaǵy turǵyn úı basqarmasynyń málimetinshe, jyl basynan beri 682 otbasy arendalyq pátermen qamtylǵan.