Bir aıdan asa ýaqyt ashtyq jarıalaǵan Grýzıanyń eks-prezıdenti Mıhaıl Saakashvılı túrmede esinen tanyp qaldy. Bul týraly saıasatker advokattarynyń biri Beka Basılaıa habarlady.

– Mısha (Mıhaıl Saakashvılı - red.) advokattarmen kezdesýden keıin shyǵyp, taıyp, qulady. Osydan keıin men onyń daýsyn estimedim, kózin ashpady. Olar zembil ákelip, alyp ketti. Qazir jaǵdaıy qalaı ekenin bilmeımin. Bul – 10 mınýt buryn bolǵan. Buǵan deıin ózin óte nashar sezindi, – dedi advokat Beka Basılaıa.

Artynsha Saakashvılı jansaqtaý bóliminde ekeni belgili boldy, onyń jaǵdaıy qalypqa kelgeni habarlandy.

Mıhaıl Saakashvılı 2004-2013 jyldar aralyǵynda Grýzıa prezıdenti bolǵan. Keıin úsitnen birneshe qylmystyq is qozǵalǵannan keıin elden ketýge májbúr bolǵan. Sot oǵan syrttaı úkim kesken. Saakashvılı ózine taǵylǵan aıyptyń saıası astary bar dep sanaıdy. Mıhaıl Saakashvılı 1 qazanda óz erkimen Grýzıaǵa kelip, birden ustalǵan bolatyn.