Aqtóbe oblysynyń ákimi Ońdasyn Orazalın 6 qazan, sársenbi kúni Aqtóbe qalasyn jumys babymen aralaý kezinde joldardyń qurylysymen, kóshelerdiń abattandyrylýy jáne jaryqtandyrylýymen tanysty.

Garnızonnaıa kóshesinde uzyndyǵy 739 metrlik avtokólik jolynyń kúrdeli jóndeý jumystary aıaqtalýǵa jaqyn. "KTP" JSHS merdiger uıymynyń ókilderi jumystyń barysy jaıly esep berdi.

Joldyń jóndeý jumystarynan bólek, joba jalpy uzyndyǵy 1 100 metr bolatyn kóshelerdi, jaıaýjoldar men jol jıegindegi avtoturaqtardy jaryqtandyrýdy qarastyrǵan. Jumys qazan aıynyń ekinshi jartysynda aıaqtalady dep josparlanyp otyr.

Qazan aıynyń sońyna qaraı Qısyq kóldegi joldyń kópten kútken jóndeý jumystary aıaqtalýy tıis. 6 qazan kúni asfált jabyndysynyń birinshi qabatyn tóseý bastaldy. Barlyǵy 1987 metr jolǵa asfált tóseletin bolady.

Ońdasyn Orazalın "Tolagai-2050" JSHS merdiger mekemesine Qısyq kól turǵyndarynyń saıajaı ujymynyń bir bóligin jańa jóndelgen jolmen qosatyn qara joldyń 12 metrin asfálttaý týraly ótinishterin qanaǵattandyrýdy tapsyrdy.

"Túptep kelgende bári turǵyndar úshin istelip jatyr, sondyqtan, eger múmkindik bolsa ótinishti oryndaý kerek",- dedi O.Orazalın.
Qalany qyzmettik aralaý qoǵamdyq keńistikterdi abattandyrý jumystarynyń barysymen tanysýmen jalǵasty.

Á.Moldaǵulova dańǵyly boıyndaǵy Temirjol basqarmasy ǵımaratynyń aldyndaǵy gúl baǵyn qalpyna keltirý jumystary aıaqtaldy. "Qala invest" JSHS jumysshylary 12 myń m2 sýarý júıesin ornatyp, kógaldandyrý, jaryqtandyrý jumystaryn júrgizdi, jaıaý júrginshiler jolyn tósedi, balalar oınaıtyn jáne vorkaýt alańdaryn, oryndyqtar, qoqys jáshikterin jáne t.b. ornatty. Barlyq atqarylǵan jumystyń kepili - 2 jyl.

Aǵaıyndy Jubanovtar kóshesinde de oblys ákimi «Jastar aleıasymen» tanysyp, qalpyna keltirý jumystaryna oń baǵa berdi. Aıta keteıik, qalpyna keltirý jumystary aıasynda aleıaǵa qaraı shyǵatyn eki kópqabatty úıde jastarǵa arnalǵan túrli-tústi sýretter salynǵan jańa art nysandar bolady.

Óńir basshysy sondaı-aq trıatlon parkiniń de abattandyrý jumystaryn qarap shyqty. Belsendi demalysty jaqsy kóretinder úshin munda júgiretin jáne velosıpedpen júretin joldar salynǵan, sonymen qatar, arka tárizdi biregeı LED- ekran ornatylǵan, jaryqtandyrý jáne sýarý júıeleri jolǵa qoıylǵan. Turǵyndardyń qalaýymen jaıaý júrginshiler joly salynypty.
Oblys ákimi sonymen qatar, oblys ortalyǵyndaǵy kóshelerdiń jaryǵyn da tekserdi, sonyń ishinde Álıa Moldaǵulova dańǵyly boıyndaǵy jaryq ılúmınasıasyn qarap shyqty.

Aıta keteıik, qazirgi tańda Aqtóbede qala kósheleri men aýlalaryn túngi jaryqpen qamtamasyz etýdiń aýqymdy jumystary júrgizilýde.

Aqtóbe qalasynyń ákimi A.Shaharov: «Sátpaev, Týrgenev kósheleriniń boıyndaǵy kósheler men úılerdi jaryqpen qamtý jumystary jalǵasýda. Nekrasov kóshesine de jaryq keledi. Jalpy, qalany jaryqtandyrýǵa baılanysty úlken joba jasadyq – kóne jaryq núkteleri aýystyrylyp, 9 myńǵa jýyq jańa tireý ornatylady. Asfált tóseý, jaryqtandyrý, balalar oınaıtyn jáne sport alańdaryn ornatý syndy aýlalardy abattandyrý boıynsha belsendi jumystar jalǵasyp jatyr.

Bıyl 200-den astam aýlany, keler jyly sizdiń tapsyrmańyz boıynsha osy jumystardy aýqymdy túrde jalǵastyrýdy josparlap otyrmyz. Kóshelerge jaryq berý jumystaryn da bastap kettik. Jyl sońyna deıin qalanyń barlyq jerine 700 jaryq núktesin ornatýdy aıaqtaımyz. Keler jyly jaryq berý jumystary da aýqymdyraq júrgiziletin bolady. Ondaǵan jyldar boıy jóndeý kórmegen barlyq aýlanyń abattandyrý jumystary bizdiń jospar boıynsha jýyq aradaǵy eki jylda tolyqtaı aıaqtalatyn bolady», - dep esep berdi.

Jumys saparynyń sońynda oblys ákimi qala basshylyǵyna oblys ortalyǵyn ári qaraı abattandyrýdy jáne júzege asyrylyp jatqan jobalardy ýaqytynda aıaqtaýǵa qatysty birqatar tapsyrmalar berdi.