8 qazan, juma kúni oblys ákimi Ońdasyn Orazalın Aqtóbe qalasynyń ınfraqurylymdyq damýy men abattandyrylýy boıynsha birqatar jobalardyń júzege asyrylýymen tanysty. Jumys sapary «kishi Sáńkibaı» atalatyn Álıa Moldaǵulova dańǵylynan Pojarskıı kóshesine deıingi joldardyń jóndeý jumystaryn qaraýdan bastaldy.

“KazStroıMagným” JSHS merdiger uıymynyń basshysy Rýslan Nysanbaev: «Jóndelip jatqan aýmaqtyń uzyndyǵy - 2450 metr. Búgin keshke bárin aıaqtaýdy josparlap otyrmyz»,- dep baıandady.

Bul jobanyń júzege asyrylýy Sáńkibaı batyr dańǵylyndaǵy jol qozǵalysyn jeńildetedi dep kútilip otyr.

Bıyl Aqtóbede sondaı-aq, aýlalar men qoǵamdyq keńistikterdi abattandyrý boıynsha aýqymdy jumystar júrgizilýde. Jyl qorytyndysy boıynsha oblys ortalyǵynda barlyǵy 220 aýla jóndelip, 67 balalar oınaıtyn alań salynbaq, sonymen qatar, 9 saıabaq pen gúl baǵy qalpyna keltiriledi.

Juma kúni «Alaqaı» oblystyq qýyrshaq teatrynyń mańynda ornalasqan «Turǵyndar qalashyǵy» aýdanynda qalpyna keltirilgen gúl baǵynyń ashylýy ótti. Munda kógaldandyrý jáne jaryqtandyrý jumystary júrgizilip, jaıaýjoldar tóseldi, balalar oınaıtyn alań men eresekterge arnalǵan jattyǵý alańy ornatyldy.

«Qalamyz kúnnen kúnge jaqsaryp keledi, endigi kezek bizdiń «Turǵyndar qalashyǵyna» keldi. Men osy jerde týdym, buryn ony «Aqtóbeniń Shveısarıasy» deıtin. Ýaqyt óte kele aýdan qaraýsyz qaldy, biraq oblys pen qala basshylyǵynyń beı-jaı qaramaı, nazarǵa alýynyń arqasynda úılerimiz ben osy gúl baǵy osyndaı tamasha kúıge endi. Aýdan turǵyndarynyń atynan alǵysymdy bildiremin. Osy jerde eńbek etkenderdiń bárine rahmet aıtamyn. Balalarymyz ádepti bolyp óssin desek osynyń bárin uqypty ustaıyq», dedi Larısa Sladkova.

«Osy jyly elimizdiń Táýelsizdigine 30 jyl tolady. Táýelsizdiktiń alǵashqy jyldary ońaı bolǵan joq, qıyndyqtar kóp boldy. Shekaralar aıqyndalyp, ekonomıkalyq baılanystar naryq ekonomıkasynyń qyspaǵyna shydamaı, úzilip jatty, óndirister jabylyp jatty, kolhozdar men sovhozdar jabyldy, jumyssyzdyq paıda boldy, búdjet kirisi azaıdy. 90-shy jyldary zeınetaqyny, dárigerler men muǵalimderge eńbekaqyny bere almaı qalǵan kezder boldy. Osynyń barlyǵy esterińizde. Elbasynyń dana ári kóregen saıasatynyń, halqymyzdyń shydamlyǵynyń, birligi men eńbekqorlyǵynyń arqasynda biz bul synaqtan da óte aldyq. Búgin, nyǵaıǵan ekonomıkanyń arqasynda bizde kóptegen suraqtardy sheshýge múmkindik bar. Sonyń ishinde, halyqty mekteptermen jáne medısınalyq mekemelermen qamtý, qaraýsyz qalǵan kóptegen ǵımarattardy, sonymen qatar, saıabaqtar men gúl baqtaryn jóndeý boıynsha úlken jumystar júrgizilýde»,- dedi aýdan turǵyndarymen tildesken Ońdasyn Orazalın.

Ózińizge belgili, «Turǵyndar qalashyǵynda» bıyl aýdandy qaıta jańartý boıynsha úlken jumystar júrgizilgen bolatyn. Oblys ákimi «Turǵyndar qalashyǵynyń» keıpin ózgertý jumystary jalǵasatynyna sendirdi. Budan ózge, jaryn aýlalardy, qoǵamdyq keńistikterdi abattandyrý, qalanyń «GMZ», «Malyshka», «Áýe qalashyǵy» sekildi eski bóligindegi úılerdiń qasbetin jańartý jobalary júzege asyrylady.

Jumys sapary kezinde óńir basshysy Kirpishti aýylyndaǵy kóshelerdiń kólik júretin joldarynyń jóndeý jumystarymen tanysty. Qazirgi tańda munda jalpy uzyndyǵy 2650 metr bolatyn tórt kósheniń joldary jóndelip jatyr. Budan basqa, kirpishti aýylyndaǵy 15-ten astam kósheni joldaryn jóndeýge jobalyq-smetalyq qujattama ázirlenip jatyr.

Sonymen qatar, Qyzyljar-2 kentinde jalpy uzyndyǵy 1950 metr avtojoldardy ortasha jóndeý jumystary, al Qyzyljar - 3 kentinde uzyndyǵy 1314 metr jol qurylysy jalǵasýda.

Jumys barysymen tanysyp, merdiger uıymdardyń esepterin tyńdaǵan oblys ákimi qala ortalyǵynan shalǵaıdaǵy turǵyn úı alaptary men qala mańyndaǵy aýyldarda qolaıly orta men ınjenerlik ınfraqurylymdy damytý boıynsha jumysty jandandyrýdy tapsyrdy.

"Joldardy barynsha qamtamasyz etý kerek. Qoǵamdyq kólik júretin negizgi kóshelerden, mektepterge, aýrýhanalarǵa, basqa da áleýmettik nysandarǵa baratyn joldardan bastap, birtindep basqa kóshelerge kóshińizder", - dedi Ońdasyn Orazalın jaýapty memlekettik organdardyń basshylaryna.

Budan keıin aımaq basshysy İle sý qabyldaǵyshyn keńeıtý jumystarynyń barysymen tanysty. Munda oń jáne sol jaǵalaýlarda qosymsha 14 uńǵyma burǵylanady.

Jobany iske asyrý Tamdy sý qabyldaǵyshynyń ekinshi kóterilýiniń sorǵy stansıasyna sý berýdi táýligine 50 myń tekshe metrge deıin arttyrýǵa múmkindik beredi. Nátıjesinde Parasat jáne Dýman turǵyn úı alaptary sýmen qamtamasyz etiledi, sondaı-aq Batys-1 jáne Batys-2 shaǵyn aýdandaryna sý berý jaqsartylady. Sý alýdy keńeıtý jumystary 2021 jyldyń jeltoqsanynda aıaqtalady.

"Nur–Aqtóbe" yqsham aýdanyndaǵy qazandyqtyń keńeıtý barysymen tanysqan oblys ákimi jylý berý maýsymynda qalany úzdiksiz jylýmen qamtamasyz etýge qatysty birqatar tapsyrmalar berdi.

"Aqtobe su-energy group" AQ bas dırektory Asqar Qystaýbaev búgingi tańda áleýmettik nysandar 100% jáne Aqtóbe qalasyndaǵy kóppáterli úılerdiń 98% jylý júıesine qosylǵanyn habarlady.

"Jylý áli qosylmaǵan úıler bar, biraq bul PIK, kondomınıýmdardyń kinási. Biz olarǵa maýsym aıynan bastap sý synaqtaryn júrgizý, elevatorlardy tekserý, qubyrlardy jóndeý qajettiligi týraly aıttyq. Kóbisi ótpedi, biraq biz qaıda barsaq ta, jylý berdik. Biz pozısıaǵa kiremiz. Qalǵan nysandar boıynsha jumys júrgizip jatyrmyz", - dedi A.Qystaýbaev.