Japondyq kásipker Iýsaký Maezava Halyqaralyq ǵarysh stansasyna (HǴS) sapar shegip, ǵaryshqa shyqqan mıllıarderler qataryna qosyldy.

Maezava otyrǵan reseılik zymyran Qazaqstandaǵy Baıqońyr ǵarysh aılaǵynan ushty.

Ol HǴS-ta 12 kún bolady dep kútilýde. Mıllıarder sońǵy jyldary stansaǵa barǵan alǵashqy ǵaryshtyq týrıs.

Bul Maezava myrzanyń 2023 jyly bolatyn Aıǵa saparynyń alǵysharty.

Sársenbi kúngi ushyrýda Maezava myrza reseılik ǵaryshker Aleksandr Mısýrkınmen jáne mıllıarderdiń dosy Iozo Hıranomen birge boldy. Iozo Hırano YouTube arnasy úshin saıahatty túsirip jatqan beıne prodúser.

Maezava ushyrylǵanǵa deıin qatań jattyǵý baǵdarlamasynan ótti, oǵan kólbeý tósekte uıyqtaý, oryndyqta aınalý jáne uzaq ýaqyt badmınton oınaý kiredi. Munyń barlyǵyn ol áleýmettik jelide kórsetken.

Ol amerıkalyq mıllıarder Djeff Bezos pen ulybrıtanıalyq dáýletti adam Rıchard Brensonnan keıin ǵaryshqa ushqan mıllıarder. Onyń bul sapary 88 mln dollarǵa baǵalanǵan.

Forbes jýrnaly ony 1,9 mıllıard dollar jeke baılyǵymen Japonıanyń 30-shy eń baı adamy dep atady.

Ol 2019 jyly Ilon Maskqa tıesili SpaceX kompanıasy arqyly Aıdy aınala ushatyn alǵashqy jeke jolaýshy bolatyny jarıalanǵan.

"DearMoon" dep atalatyn bul reıs 2023 jyly bolady dep josparlanýda. Maezava naýryz aıynda ózimen birge segiz adamdy ǵarysh saparyna alyp júretinin jáne búkil joldyń qunyn kóteretinin málimdegen.