Túrkıa prezıdenti Rejep Erdoǵan túrik lırasy tarıhı quldyraýdan keıin qaıta qalpyna kele bastaǵanyn málimdedi. Bul týraly DW aqparat agenttigi habarlady.

Keshe ulttyq valútanyń dollarǵa qatysty baǵamy 18,3-ge deıin tómendep, el prezıdentiniń úndeýinen keıin birden 13 jarym lıraǵa qymbattaǵan.

Prezıdenttiń aıtýynsha, azamattarǵa jańa qarjylyq balama usynylady. Azamattarǵa depozıttegi salymdy túrik lırasynan shetel valútasyna aýystyrýdyń qajeti bolmaıdy. Sebebi lıramen saqtalatyn depozıt syıaqysy valúta baǵamynan joǵary bolmaq.

– Endi aıyrbas baǵamy joǵary bolady dep eshbir azamatymyzdyń depozıtterin lıradan shetel valútasyna aýystyrýdyń qajeti bolmaıdy. Valúta baǵamynyń qubylýyna baılanysty baǵa berýde qınalǵan eksporttaýshy kompanıalarymyzǵa Ortalyq bank arqyly forvardtyq baǵam beriledi. Baǵamdaǵy aıyrmashylyq eksporttaýshy kompanıaǵa lıra túrinde tólenedi, – dedi Túrkıa prezıdenti Rejep Taıyp Erdoǵan.

Ortalyq banktiń paıyzdyq mólsherlemeni tómendetý úrdisi  jalǵasa bermek. Erdoǵan bul jaǵdaı birer aıdan keıin ınflásıanyń tómendeýine alyp keletinin atap ótti.

Budan bólek, jańa ekonomıkalyq baǵdarǵa sáıkes, memlekettik qyzmetker, zeınetkerlerdiń jalaqysy artyp, shákirtaqylar joǵarylaıdy.