26 jeltoqsan kúni ótetin Ninety One, Orda toptarynyń offlaın jáne onlaın formattaǵy konserti qarsańynda “Daryn Online” respýblıkalyq bilim berý platformasynyń uıymdastyrýymen baspasózge arnalǵan jıyn ótti.

Sharaǵa Ninety One tobynyń negizin qalaýshy, JUZ Entertainment basshysy, prodússer Erbolat Bedelhan, Daryn Online bilim berý platformasynyń negizin qalaýshy Aıbek Qýatbaı, telejýrnalıst Asqat Sadyrbaı qatysty.

Aldaǵy konserttiń onlaın kórsetilimin Daryn Online platformasy qamtamasyz etetin bolady. Ol úshin arnaıy juz.daryn.online resýrsy iske qosylǵan. Beldi prodúser onlaın kórsetilimdi uıymdastyrýshylardy izdeý barysynda tańdaý Daryn Online platformasyna kezdeısoq túspegenin aıtady.

– Daryn online-men birge jumys jasamas buryn bul platformany uzaq zerttedim. Daryn Online úlken aýdıtorıasy bar, elimizdegi aldyńǵy qatarly IT-kompanıalardyń biri. Odan bólek qundylyqtarymyz da ortaq eken. Ol – qazaqsha kontentti ekporttaý, álemdik naryqqa shyǵý, ultqa qyzmet etý. Onlaın konsert jasaıyq degen usynys ta bizdiń tarapymyzdan boldy, – dedi Ninety One tobynyń prodússeri Erbolat Bedelhan.

Aıbek Qýatbaı aldaǵy is-shara arqyly onlaın konsert uıymdastyrý mádenıetin qalyptastyrýdy kózdeıtinin atap ótti.

– Shet elde onlaın konsert kórý mádenıeti jaqsy qalyptasqan. Bizdiń maqsat – sol mádenıetti Qazaqstanda qalyptastyryp, IT-tehnıkalyq deńgeıimizdi shet elge kórsetý. Qazirdiń ózinde onlaın-konsertke bılet alǵandardyń 15%-yn Fılıppın, Malaızıa, Belorýs jáne Indonezıa elderiniń ókilderi quraıdy. Bastamamyz izgi jalǵasyn tabady degen nıettemin, – dedi Daryn online bilim berý platformasynyń negizin qalaýshy.

Jıynda qazaqsha kontenttiń keleshegi men álemdik óner naryǵyna enýi jaıly ıdeıalar men máseleler qozǵalyp, Ninety One tobynyń AQSH-qa ketýi jaıly da aıtyldy.

– Biz munda jyly tósegimiz de qala bersek bolady. Biraq biz olaı damı almaımyz, álemdik naryqqa ene almaımyz, qazaq ónerin eksporttaı almaımyz. Qazirgi tańda elińdi, ultyńdy jarnamalap, tanytýdyń basty quraly – mýzyka. Endeshe sol mýzyka qudiretimen qundylyqtarymyzdy kóterip ári kórsete bilýimiz kerek, – dedi Erbolat Bedelhan sózin qorytyndylap.

Aldaǵy konsert JUZ Entertainment pen Daryn online seriktestiginiń basy emes. Buǵan deıin jeltoqsan aıynyń basynda Ninety One tobynyń "DARN" atty áni men sol ánge túsirilgen mýzykalyq vıdeo jaryq kórgen. Týyndy jastardy damýǵa, ózderine senýge shaqyrady. Kollaborasıasynyń maqsaty – óskeleń urpaqty jigerlendirý, qundylyqtardy umytpaý. Endigide "DARN" áni Daryn online bilim berý platformasynyń gımni sanalady.