Kezdesýge shet elderdiń kórnekti memleket qaıratkerleri men Nobel syılyǵynyń laýreattary – Izraıldiń burynǵy prezıdenti Sh.Peres, Polshanyń burynǵy prezıdenti L.Valensa, Kolýmbıanyń burynǵy prezıdenti S.Trýhılo, Ispanıanyń burynǵy premer-mınıstri H.Sapatero, MAGATE-niń burynǵy bas dırektory M.Al-Baradeı jáne basqalar qatysty. Bul týraly "Qamshy" portaly Aqorda.kzke silteme jasaı otyryp habarlaıdy.
Kezdesýge qatysýshylar álemdik saıasattaǵy, ekonomıka men halyqaralyq qaýipsizdik salasyndaǵy ahýaldy talqylady. Osy oraıda elimizdiń syrtqy saıasatqa qatysty bastamalary men halyqaralyq qoǵamdastyqtyń álemdegi túrli qaqtyǵystardy sheshý úshin kúsh jumyldyrýy barysyndaǵy róli jóninde másele qozǵaldy.
Sonymen qatar kezdesýde Qazaqstannyń qalyptasqan ekonomıkalyq jaǵdaıda ornyqty damýdy qamtamasyz etý úshin qabyldap jatqan sharalaryna aıryqsha nazar aýdaryldy.
Qazaqstan Prezıdenti elimizdiń Táýelsizdik jyldary jetken jetistikteri týraly aıtty.
Jolymyzdy bastaǵan tusta biz kún kórý úshin kúrestik, óıtkeni Qazaqstannyń bolashaǵy men múmkindikterine qatysty boljamdar jaǵymsyz bolatyn. Mundaı perspektıva bizge unamady, sondyqtan batyl áreket jasaýǵa kiristik. Eleýli qıyndyqtyń biri sosıalısik ekonomıkany naryq jolyna túsirý edi. Úsh jylda jekeshelendirý júrgizildi, Ortalyq Azıa boıynsha eń aýqymdy ınvestısıa tartyldy. Qazaqstan búginde básekege qabiletti 50 eldiń qataryna, sondaı-aq óte mol kólemde ınvestısıa tartylǵan memleketterdiń jıyrmalyǵyna kiredi, – dedi Memleket basshysy.
Nursultan Nazarbaev álemdik shıkizat naryǵyndaǵy baǵanyń turaqsyzdyǵyna baılanysty Qazaqstanda ındýstrıalandyrý saıasaty júzege asyrylyp jatqanyna, sonyń arqasynda sońǵy jyldary júzdegen jańa kásiporyn salynǵanyna nazar aýdardy. Memleket basshysy qazirgi ýaqytta elde ındýstrıalyq-ınnovasıalyq baǵdarlamanyń ekinshi besjyldyǵy iske asyrylyp jatqanyn, onyń basty maqsattarynyń biri ekonomıkanyń shıkizat resýrstaryna táýeldiligin josparly túrde azaıtý ekenin aıtty.
Qazaqstan Prezıdenti elimiz kólik-logıstıka áleýeti men ınfraqurylym qurylysyn damytýǵa baǵdar ustaǵanyna toqtaldy. Bul oraıdaǵy jumsalǵan kúsh-jiger baǵyttardy ártaraptandyryp, ózge eldermen taýar aınalymy kólemin edáýir ulǵaıtýǵa múmkindik berdi.
Memleket basshysy sondaı-aq Ulttyq qor sıaqty «qaýipsizdik quraly» Qazaqstanǵa belgilengen josparlaryn júzege asyryp, áleýmettik mindettemelerin oryndaýdy jalǵastyrýǵa múmkindik beretinin aıtty.
Nursultan Nazarbaev elde beıbitshilik pen turaqtylyqty saqtaýdyń mańyzdylyǵyna, sonyń arqasynda búginde qazaqstandyqtar bolashaqqa nyq senimmen qaraıtynyna nazar aýdardy.
