Óskeleń urpaqqa sapaly bilim, sanaly tálim-tárbıe berý úshin birinshi kezekte bilgir maman, bilikti pedagog daıyndaýymyz kerek. Bul týraly "Qamshy" portaly Baq.kz -ke silteme jasaı otyryp habarlaıdy.

Jumys babymen Shymkentke barǵan QR Bilim jáne ǵylym mınıstri óńir basshylarymen basqosý barysynda osy ortaq mindetti minsiz atqarýǵa shaqyrdy. Sapar barysynda Ońtústik Qazaqstan Pedagogıkalyq ınstıtýtynyń sý jańa jataqhanasyn aralap shyqqan mınıstr zamanaýı úlgide salynǵan «Stýdentter úıiniń» jaı-kúıine tánti boldy. 500 orynǵa laıyqtalǵan jataqhana qurylysyna 1 mlrd 237 mln teńge jumsalǵan. Ǵımarat ishinde kitaphana, asqana, arnaıy medısınalyq kabınetter, hımıalyq tazartý bólimshesi de bar. Tipti, tálimgerler úshin shashtaraz da ashylǵan. Qonaqúıden kem túspeıtin jatynjaıǵa tek úzdik stýdentter ǵana jaıǵasa alady. Bilim jáne ǵylym mınıstri oqý ozattarynyń alǵashqy legine óz qolymen bólme kiltin tabys etti. Aıta keteıik, 3 myńdaı jas bilim alatyn irgeli oqý ordasy bıyl 900-den astam shákirt qabyldady. Onyń 63 paıyzy memlekettik bilim grantyna ıe boldy. Saltanatty rásimnen soń, oblys ákimi Beıbit Atamqulovpen kezdesken Aslan Sárinjipov mamandar daıarlaý máselesine aıryqsha kóńil bóldi. Beıbit Bákiruly usynǵan ıdeıa mınıstr tarapynan qoldaý tapty. Oblys basshysynyń aıtýynsha, joǵary oqý ornyn bitirgen pedagogtardy aýyl-aımaqtarǵa tartý úshin ustazdarǵa arnaıy áleýmettik kómek taǵaıyndaý qajet.

Aslan Sárinjipov, QR Bilim jáne ǵylym mınıstri:

- Ekonomıkalyq qıyndyqtarǵa qaramastan, memleket tarapynan qarajat bólingen. Stýdentterdiń áleýmettik jaǵdaıyn kóterý úshin osy jataqhana salyndy. Bıyl memleketimizde birneshe jataqhana ashylady. Memleket tarapynan stýdentterge óte úlken kómek beriledi. Jyl saıyn 150 grant bólemiz. Kelesi jyly stýdentterdiń stıpendıasy 25 paıyzǵa ósedi.