«Qazaqstan – 2050» jalpyulttyq qozǵalysynyń demeýshiligimen ál-Farabı atyndaǵy Qazaq ulttyq ýnıversıteti jýrnalısıka fakúltetinde Qazaq handyǵynyń 550 jyldyǵyna arnalǵan kórme ashyldy. Bul týraly "Qamshy" portaly Aıqynǵa silteme jasaı otyryp habarlaıdy.
Kórmege fılologıa, tarıh fakúltetiniń ókilderi qatysty. Qazaq handyǵynyń 550 jyldyǵy qarsańynda jýrnalısıka fakúltetiniń stýdentteri «Fotoóner» qoǵamdyq birlestigimen Jambyl – Shý –Moıynqum aýdandarynda fotoekspedısıa ótkizdi. Kórmege ekspedısıa barysyndaǵy fototilshiler men stýdentterdiń úzdik jumystary qoıyldy.
Sondaı-aq Bilim jáne ǵylym mınıstrliginiń «Eldiń ıntellektýaldy áleýeti» memlekettik baǵdarlamasy aıasynda fakúltettiń jas ǵalymdary «Qazaq eli» stýdenttik ǵylymı ekspedısıasyn uıymdastyryp, aımaqtarǵa zertteýler júrgizdi. Ekspedısıanyń negizgi maqsaty – BUU mádenı murany saqtaý týraly halyqaralyq konvensıasyna sáıkes qazaq halqynyń qundylyqtaryn tanytý, zertteý jáne saqtaý. Stýdenttik ekspedısıanyń endigi nysany – Qyzylorda, Qostanaı, Aqmola, Qaraǵandy óńirlerine zertteý júrgizý. «Qazaq eli» stýdenttik ǵylymı ekspedısıasynyń qorytyndy jumystary kórmege usynyldy.
Asylhan ÁBDİRAIYM, «Fotoóner» qoǵamdyq birlestiginiń tóraǵasy, aǵa oqytýshy:
– Qazaq handyǵynyń 550 jyldyǵyna oraı ál-Farabı atyndaǵy Qazaq ulttyq ýnıversıteti jýrnalısıka fakúltetiniń fotojýrnalıstıkaǵa qyzyǵýshylyq tanytyp júrgen stýdentteri, «Fotoóner» qoǵamdyq birlestigi men respýblıkalyq, qalalyq gazetterdiń fototilshileri maýsym aıynda Jambyl – Shý – Moıynqum aýdandaryna fotoekspedısıa ótkizdi. Mundaǵy maqsat – Qazaq handyǵynyń alǵashqy ýyq qadaǵan jerimen tanysý, tarıhqa úńilý jáne ekspedısıa barysynda stýdentterge fototilshilerdiń sheberlik synyptaryn ótkizý. Kóne ǵasyrdaǵy «Aqyrtas» qalashyǵy, Shý óńirindegi Qozybastaý taýy, sol aımaqtaǵy «Hantaý» óńirindegi tarıhı jádigerlermen tanystyq. Sol fotoekspedısıada túsirilgen úzdik sýretter kórmege qoıyldy. Al Astana qalasyndaǵy teatrlandyrylǵan qoıylym kórinisteriniń avtory – Edil Ormanov. Kórmede fototilshiler men stýdentterdiń eńbekteri qamtyldy. Búkil el bolyp toılap jatqan tarıhı uly merekege sýret arqyly óz úlesimizdi qosqymyz keldi. Igi bastamaǵa Jambyl oblysy ákimdigi men «Nur Otan» partıasynyń oblystyq fılıaly qoldaý kórsetti.
Gúlmıra SULTANBAI, «Baspasóz jáne elektrondy BAQ» kafedrasynyń meńgerýshisi, profesor:
– Bıyl úshinshi ret uıymdastyrylyp otyrǵan ekspedısıanyń taqyryby Qazaq handyǵynyń 550 jyldyǵyna arnaldy. Negizgi maqsaty – jas ǵalymdar men stýdentterge qazaq jeriniń ulttyq qundylyqtaryn tanytý, zertteý. Úsh jyl qatarynan IýNESKO-nyń Almatydaǵy klasterlik búrosy, BUU-nyń Aqparattyq búrosy tikeleı qoldaý kórsetip, keńester berip keledi. 20 kúnge sozylatyn ekspedısıada stýdentter el táýelsizdiginen beri qaraıǵy óńirlerdegi halyqtyń turmys-tirshiligi, sol aımaqqa tán ulttyq qundylyqtary, salt-dástúr erekshelikteri jáne taǵy basqa mádenı-tanymdyq zertteýlerge kóp kóńil bóledi. Budan bólek qazaq dalasynyń, tarıhı baı qalalarynyń fotokartasyn jasaýdy qolǵa aldy. Iaǵnı, «googlemap», «ıandeksmap»-tyń tegin resýrstaryn paıdalana otyryp, stýdentter aralaǵan aımaqtardyń kartasyn syzyp otyrý. Búgin úsh ekspedısıanyń qorytyndysyn kórmege qoıdyq.
