Prezıdent Qasym-Jomart Toqaevtyń tapsyrmasy boıynsha úkimettik komısıa músheleri Mańǵystaýdaǵy belsendilermen kelissóz júrgizip jatyr. Bul týraly Primeminister.kz habarlady.

"Úkimettik komısıa suıytylǵan gaz baǵasyn tómendetýdi talap etken bastamashyl toppen kezdesý ótkizip jatyr. Jıynǵa qatysýshylar qoǵamdyq qaýipsizdikti saqtaı otyryp, jaǵdaıdy retteý múmkindigin talqylap jatyr", delingen habarlamada.

Eske salaıyq, Mańǵystaý oblysy Jańaózen, Aqtaý qalalarynda avtomobılge arnalǵan suıytylǵan gazdyń qymbattaýyna baılanysty turǵyndar 3 kún qatarynan narazylyqqa shyǵyp jatyr.

Úkimet gaz baǵasyn kásipkerler esebinen 120 teńgeden 85-90 teńgege deıin túsirýge ázir ekenin málim etti. Alaıda turǵyndar gaz baǵasy burynǵydaı 50 teńge kelgenin qalaıdy.

Mıtıńte "úkimet otstavkaǵa ketsin" degen talaptar da aıtylyp jatyr.