Búgin Atyraýda túski ýaqyttan keıin 5 myńnan astam turǵyn Isataı men Mahambet ortalyq alańdaryna jınaldy. Olar  Jańaózendikterge qoldaý bildirip, «Shal ket», «Baǵa arzandasyn!» dep talap qoıyp jatyr. Bul týraly Aq Jaıyq basylymy habarlady.

Polısıa men arnaıy jasaq joldy jaýyp tastaǵanymen, sherýshiler qorshaýdy buzyp ótti. Polısıa narazylyq bildirýshilerdiń birin ustaǵannan keıin narazy halyq pen polısıa arasynda qaqtyǵys boldy. Nátıjesinde avtozakty toqtatyp, ishindegi ustalǵan azamattardy bosatyp aldy.

Qazirgi ýaqytta alańda birde-bir sheneýnik joq. Polısıany jergilikti polısıa qyzmetiniń basshysy Álibek Qaıyrov basqarady. Jınalǵan azamattar azyq-túlik pen janar-jaǵarmaı baǵasyn tómendetýdi talap etýde.Polısıa birneshe negizgi kóshelerdi jaýyp qoıǵanyna qaramastan, narazylyq bildirýshiler sany sekýnd saıyn artyp keledi.

Eske salaıyq, Mańǵystaý oblysy Jańaózen, Aqtaý qalalarynda avtomobılge arnalǵan suıytylǵan gazdyń qymbattaýyna baılanysty turǵyndar 3 kún qatarynan narazylyqqa shyǵyp jatyr.

Úkimet gaz baǵasyn kásipkerler esebinen 120 teńgeden 85-90 teńgege deıin túsirýge ázir ekenin málim etti. Alaıda turǵyndar gaz baǵasy burynǵydaı 50 teńge kelgenin qalaıdy.

Mıtıńte "úkimet otstavkaǵa ketsin" degen talaptar da aıtylyp jatyr.

Prezıdent Qasym-Jomart Toqaevtyń tapsyrmasy boıynsha úkimettik komısıa músheleri Mańǵystaýdaǵy belsendilermen kelissóz júrgizýde.