Úkimettik komısıa Aqtaý qalasyndaǵy Yntymaq alańyna jınalǵan belsendilermen kezdesip ortaq sheshimge keldi.

"Alańda bolǵan adamdardy jaýapkershilikke tartpaý týraly kepildik berildi. Taraptar týyndaǵan barlyq máselelerdi syndarly dıalog aıasynda jáne qoldanystaǵy zańnama sheńberinde sheshýge kelisti" delingen aqparattyq habarlamada.

2 qańtardan beri avtokólikke arnalǵan suıytylǵan gaz qunynyń qymbattaýyna baılanysty Jańaózen turǵyndary narazylyqqa shyqqan. Artynsha Aqtaýda, Almatyda, Oral, Shymkent jáne elordada azamattar jańaózendikterdi qoldap alańǵa shyqty. Dese de eń úlken narazylyq sharalary Jańaózen men  Aqtaýda boldy.

Bılik narazylyq bastalǵan alǵashqy kúnnen gaz baǵasyn burynǵydaı 50 teńge mólsherinde belgileý múmkin emestigin, tek kásipkerler esebinen 90-85 teńgege deıin ǵana tómendetýge bolatynyn málim etken.

Alaıda bul narazy turǵyndardy qanaǵattandyrmady. Olar talaptarynan qaıtpaı, kesheli beri úkimet otstavkaǵa ketsin dep  ishinara saıası talaptar qoıa bastaǵan.