Prezıdent Qasym-Jomart Toqaev narazylyq bildirýshilerdi destrýktıvti toptardyń úndeýine qulaq aspaýǵa shaqyrdy. Bul týraly ol óziniń Twitter paraqshasynda jazdy. 

"Úkimet óz ókilettiginiń aıasynda eldegi turaqtylyqty qamtamasyz etý maqsatymen Mańǵystaý oblysynda suıytylǵan gaz baǵasynyń ár lıtrin 50 teńgege deıin tómendetý týraly sheshim qabyldady", "Demonstranttardy elimizdiń tutastyǵy men birligine syzat túsirýdi kózdeıtin destrýktıvti toptardyń úndeýine qulaq aspaýǵa shaqyramyn. Basqa da áleýmettik-ekonomıkalyq talaptar erteńgi elordada ótetin keńes barysynda jeke qarastyrylady", dep jazdy prezıdent. 

Eske salaıyq, birer saǵat buryn Qazaqstan premer-mınıstriniń orynbasary Eraly Toǵjanov Aqtaýda alańǵa jınalǵan halyqqa komısıanyń sheshimin jarıalady. Ol gaz baǵasy lıtrine 50 teńgege deıin tómendeıtinin málimdedi. Bul "QazMunaıGaz" UK AQ áleýmettik jaýapkershiligi aıasynda júzege asyrylady.

Sondaı-aq alańda bolǵan adamdardy jaýapkershilikke tartpaý týraly kepildik berildi.

Taraptar týyndaıtyn barlyq máseleni syndarly dıalog arqyly jáne qoldanystaǵy zańnama sheńberinde sheshýge ýaǵdalasqany habarlandy.

5 qańtar Q.Toqaev eldegi áleýmettik-ekonomıkalyq máselege qatysty jıyn ótkizedi.