Aralas jekpe-jek sheberi Qýat Hamıtov úıinen "OMON" qyzmetkerleri ustap áketkenine baılanysty pikir bildirip, sport karerasyn aıaqtaıtynyn málim etti. Bul týraly ol áleýmettik jelidegi paraqshasynda aıtty.
Aıtýynsha, beıbit mıtıńke batystyq baýyrlaryn qoldaý maqsatynda shyqqan.
– Eshkim eshteńeni buzǵan joq, eshteńege tıisken joq. Halyq jınala bastaǵan kezde polıseıler, polısıa bólimderiniń, qala ákiminiń orynbasary, prokýratýra ókilderi keldi. Olardyń barlyǵy mıtıńtiń beıbit túrde ótkenin kórdi, eshkim eshkimdi soqqyǵa jyqqan joq. Biz ol jerde shamamen 5-6 saǵat boldyq. Memleketke qandaı talap qoıatynymyzdy aıtyp, beıneúndeý jazdyq. Bul negizinen azyq-túlik, benzın, gaz baǵasy kóterilmesin degen talap boldy. Memleket jaǵdaıdy baqylaýǵa alyp, baǵany kótergender óz ornyn bosatýyn suradyq. Árıne, daý-damaısyz bolmady. Shamam kelgenshe qorǵadym, – dedi sportshy.
Hamıtov polısıa, prokýratýra, memlekettik organ qyzmetkerine birde-bir narazylyq bildirýshi saýsaǵynyń ushyn da tıgizbegin aıtty.
– Men ol jerden shyǵyp ketkende ákimniń orynbasary maǵan qońyraý shalyp, halyqty tynyshtandyrýǵa kómektesýimdi ótindi. Óıtkeni onyń aıtýynsha, adamdar meni tyńdaıdy, qurmetteıdi. Men "Halyq arenaǵa" baryp, jınalǵandarmen sóılesýdi jón kórdim. Halyq meni qurmettep qarsy alyp, sóz berdi. Biz óz-ózimizge jaý emes ekenimizdi, elimizdi jaǵyp, qıratyp, órteýdiń keregi joqtyǵyn, biz batys óńirdi qoldaý úshin jáne memleket bizdi estýi úshin jınalyp jatqanymyzdy aıttym. "Qazir joldy jappaıyq, jedel járdem bar, jumystan kele jatqan halyq bar, jurtty shoshytpaı, myna joldan keteıik. Basqa bir jerge baryp aıtatymyzdy talabymyzdy aıtaıyq" dep halyqty sol jaqtan alyp ketken bolatynmyn, – dedi Qýat Hamıtov.
Ol bári aıaqtalǵannan keıin úıine qaıtqanyn jáne qalada búlik bolyp jatqanda qala syrtyndaǵy úıinde bolǵanyn jetkizdi.
– Bul kúnderi ınternet baılanysy bolmady. Keıin ulttyq qaýipsizdik qyzmetkerleri dosym arqyly menimen baılanysqa shyǵyp, "nege qashyp kettiń?" dep surady. Men olarǵa eshqaıda qashpaǵanymdy, ınternet baılanysy bolmaı uıaly telefonym óship qalǵanyn aıttym. Sodan olarmen UQK ǵımaratynda kezdesemiz dep kelistik. Qalaǵa kelip endi olarǵa barýǵa jınalyp jatqanymda arnaıy organnan adamdar kelip, túsindirmeı ustap alyp ketti. Olar meniń ákemdi avtomatpen bir uryp jiberdi, ózimdi de soqqyǵa jyqty. Sóıtip esh túsindirmesten úıden alyp ketti. Bizdi polısıa bólimshesine jetkizgennen keıin ne úshin aıyptap turǵandaryn aıtpady. Sol jerde meniń kesirimnen quqyq qorǵaý qyzmetkerleri qaıtys bolǵanyn estidim, sol úshin ustap otyrǵan, – dedi Hamıtov.
Qýat Hamıtov sondaı-aq sporttaǵy karerasyn aıaqtaıtynyn málimdedi. Ol buǵan deıin 5 jyl karerasyn jalǵastyrý jospary bolǵanyn jetkizdi. Aıtýynsha, endi ómirinde jańa taraý, jańa karera bastalady. Sportshy sheshimi naqty nemen baılanysty ekenin, jańa taraý dep neni meńzep otyrǵanyn aıtpady.
Buǵan deıin Hamıtovti "OMON" qyzmetkerleri soqqyǵa jyqqanyn habarlaǵanbyz.
Almatyda mıtıń kezinde MMA sportshysy Qýat Hamıtov alańǵa shyǵyp, halyqqa qoldaý bildirgen bolatyn.
Posmotret etý pýblıkasıý v Instagram
Pikir qaldyrý