Qazaqstandaǵy tártipsizdik. Qaza tapqandar sany belgili boldy

/image/2022/01/15/crop-191_18_598x798_ddbd95ef-e349-491d-923b-1b46515d05ac.webp

Eldiń birneshe óńirinde qańtar aıynyń basynda bolǵan jappaı tártipsizdikterden zardap shekkenderdiń sany belgili boldy. Bul týraly Bas prokýratýra qylmystyq qýdalaý qyzmetiniń bastyǵy Serik Shalabaev málimdedi.

Bas prokýratýranyń habarlaýynsha, qaıtys bolǵan 225 adamnyń 175-i medısınalyq uıymdarda kóz jumǵan.

– Tártipsizdikter kezinde 4578 adam zardap shekken. Onyń ishinde 4353-i jaralanǵan, 3393-i quqyq qorǵaý organdarynyń qyzmetkerleri. Tótenshe jaǵdaı kezinde (5-14 qańtar aralyǵynda) máıithanalarǵa 225 adam jetkizildi. Olardyń bir bóligi teraktilerge qatysqan, ǵımarattar men quqyq qorǵaý organdarynyń qyzmetkerlerine shabýyl jasaǵan qarýly qaraqshylar. Qaza bolǵandardyń ishinde 19 polıseı men áskerı qyzmetshi bar, – dedi Serik Shalabaev.

Vedomstvo ókilderi bul aldyn ala derekter ekenin atap ótti. Olar áli de naqtylanady jáne ózgerýi múmkin ekenin eskertti.

– Qylmys jasady degen kúdikpen 672 adam ýaqytsha ustaý ızolátoryna jetkizildi, onyń ishinde 446-sy sot sanksıasymen qamaýǵa alyndy. Qujattardy teksergennen keıin jáne prokýratýramen ustaýǵa negiz bolmaǵandyqtan 100-ge jýyq adam bosatyldy. Búgingi tańda jedel tergeý toptary 546 qylmystyq isti tergeýde, onyń ishinde 44 – is terorızm aktileri boıynsha, 34 – is jappaı tártipsizdikter boıynsha, 15 – is adam óltirý jáne t.b, – dedi qylmystyq qýdalaý qyzmetiniń bastyǵy.

DSM qoǵammen baılanys departamentiniń dırektory Ásel Artakshınova TJ engizilgen sátten bastap 2678 zardap shegýshi medısınalyq kómekke, onyń ishinde 1815-i ambýlatorıalyq kómekke júgingenin habarlady.

– 863 adam stasıonarlyq em alýda, 598 pasıent shyǵaryldy, 265 emdeýdi jalǵastyrýda, 67 naýqas aýyr halde reanımasıada, 500-den astam adamǵa kúrdeli hırýrgıalyq operasıa jasaldy, – dedi departament dırektory.

Eske sala keteıik, 2 qańtarda Mańǵystaý oblysynyń turǵyndary suıytylǵan gazdyń qymbattaýyna baılanysty mıtıńke shyǵyp, uzamaı eldiń ózge óńirlerinde de halyq narazylyǵy ótken. Beıbit mıtıń túrinde bastalǵan narazylyq sharalarynyń sońy jappaı tártipsizdikke ulasqan. Sonyń saldarynan Almaty, Taldyqorǵan qalalary qatty zardap shekti. Tártipsizdikter kezinde ákimdik ǵımaraty órtendi, prezıdent rezıdensıasy basyp alyndy. Dúkender, saýda ortalyqtary, bank keńseleri men bankomattar tonaldy.

Qazaqstandaǵy tártipsizdik. Qaza tapqandar sany belgili boldy

Qatysty tegter :

Pikir qaldyrý

Qatysty Maqalalar