AQSH-tyń Memlekettik hatshysy Entonı Blınken búgin Eýropaǵa bardy.

Blınken Berlınde Germanıa, Ulybrıtanıa jáne Fransıa ókilderimen kezdesýden buryn Kıevte Ýkraına prezıdenti Vladımır Zelenskıımen kelissózder júrgizedi.

Juma kúni ol Jenevada Reseı Syrtqy ister mınıstri Sergeı Lavrovpen kezdesedi.

Reseı buǵan deıin kórshiles Ýkraınaǵa shabýyl jasaý josparyn birneshe ret joqqa shyǵarǵan. Alaıda seısenbide AQSH-tyń joǵary laýazymdy sheneýnikteri Máskeý "kez kelgen sátte" Ýkraınaǵa basyp kirýi múmkin ekenin aıtty. Aq úıdiń baspasóz hatshysy Djen Psakı jýrnalıserge Reseı Ýkraınamen shekarasyna jaqyn jerde ondaǵan myń ásker jınaýy "óte qaýipti jaǵdaı" týdyrǵanyn aıtty.

Ol qaqtyǵysty boldyrmaý úshin "eshqandaı nusqa tys qalmaıdy" dedi jáne "hatshy Blınkenniń barýy alda dıplomatıalyq jol bar ekenin anyq kórsetedi" dep qosty.

Aty-jónin atamaýdy ótingen AQSH memlekettik departamentindegi joǵary laýazymdy qyzmetker Frans Pres agenttigine bergen aqparatqa sáıkes, Blınken juma kúngi kelissózder kezinde Lavrovqa daǵdarystan "dıplomatıalyq jolmen shyǵýdy" usynbaqshy.

AQSH memlekettik departament sheneýnikteriniń aqparatynsha, AQSH Ýkraınanyń egemendigi men aýmaqtyq tutastyǵyn saqtaýǵa umtylady.

Ótken aptada Máskeý men batys elderi arasynda nátıjesiz kelissózder ótken. 

Máskeý Ýkraınaǵa basyp kirse, Reseıge úlken zardaptar men aýyr ekonomıkalyq shyǵyndar týdyratyn sanksıalar salynýy múmkin ekeni habarlandy. Vashıngton eýropalyq odaqtastarynan qoldaý tabýǵa tyrysady dep kútilýde.

Germanıanyń syrtqy ister mınıstri Analena Baerbok dúısenbi kúni Kıevke sapary kezinde budan ári shıelenisý "Reseı rejımi úshin ekonomıkalyq, saıası jáne strategıalyq aýyr zardaptarǵa ákeletinin" málimdedi.

Ýkraınanyń qorǵanys mınıstri Alekseı Reznıkov Batys úkimetterin Máskeýge dereý sanksıa salýǵa shaqyrdy.

Reseıdiń Ýkraınaǵa basyp kirýi qantógis pen Eýropa úshin bosqyndar daǵdarysyna ákelýi múmkin ekeni eskertildi.

Al, Reseı tarapy NATO-nyń shyǵysqa qaraı keńeıýin toqtatýdy talap etetin birqatar talaptar qoıdy.

Dúısenbi kúni Ulybrıtanıanyń qorǵanys mınıstri Ben Ýolles Reseı Ýkraınaǵa basyp kirýin aqtaý úshin NATO-ny synap, nazardy aýdaryp otyrǵanyn aıtady. Ol Pýtındi "etnoultshyl" dep aıyptady.