"Reseı Ýkraınaǵa basyp kirýi múmkin" degen qaýip kúsheıgen kezde AQSH-tyń Memlekettik hatshysy Entonı Blınken Eýropaǵa bardy.

Blınken Berlınde brıtan, fransýz jáne nemis áriptesterimen kezdesýden buryn Kıevte prezıdent Vladımır Zelenskıımen kelissózder júrgizedi.

Juma kúni ol Jenevada Reseı Syrtqy ister mınıstri Sergeı Lavrovpen kezdesedi.

Buǵan deıin Reseı Ýkraınaǵa shabýyl jasaý josparyn birneshe ret joqqa shyǵarǵan.

Alaıda seısenbide AQSH-tyń joǵary laýazymdy sheneýnikteri Máskeý "kez kelgen sátte" Ýkraınaǵa basyp kirýi múmkin ekenin aıtty.

Aq úıdiń baspasóz hatshysy Djen Psakı jýrnalıserge Reseı Ýkraınamen shekaraǵa jaqyn jerde ondaǵan myń ásker jınaýy "óte qaýipti jaǵdaı" týdyrǵanyn aıtty.

Ol qaqtyǵysty boldyrmaý úshin "eshqandaı nusqa tys qalmaıdy" dedi.

Aıta keteıik, buǵan deıin NATO Bas hatshysy Iens Stoltenberg "Eýropada jańa qarýly qaqtyǵys shyǵý qaýpi bar" dep málimdegeni jarıalanǵan. Reseı jaǵy AQSH jáne NATO-men qaýipsizdik kelissózderin "sátsiz" dep sıpattap, keıbir máseleler boıynsha kelispeýshilikter jalǵasyp jatqanyn aıtqan. NATO Reseımen sońǵy 30 jylda buryn-sońdy bolmaǵan soǵys qaýpi týǵanyn málimdegen. Uzamaı Ál-Jazıra telearnasy "Reseı Ýkraınaǵa basyp kirý úshin syltaý daıyndap jatyr" degen aqparat taratqan.