Pavlodar oblysy polısıa departamentiniń basshysy bolyp Vasılıı Sklár taǵaıyndaldy. 

Vasılıı Sklár buǵan deıin Ekibastuz qalasy polısıa departamentine basshylyq etken. Ol Qazaqstannyń birinshi vıse-premeri Roman Sklárdyń týǵan inisi.

Pavlodar oblysy polısıa departamentin buryn Ulttyq qaýipsizdik komıtetiniń burynǵy tóraǵasy Kárim Másimovtiń jaqyn týysy Nurlan Másimov basqarǵan. Ol 17 qańtarda qyzmetinen alynǵan.

Kárim Másimovtiń ózi 6 qańtarda ustalyp, Nur-Sultan qalasy Tergeý sotynyń sheshimimen 2 aıǵa qamaýǵa alynǵan. Keshe Másimovtiń isi "óte qupıa" degen sanatta júrgizilip jatqany belgili boldy. Oǵan memleketke opasyzdyq jasady, bılikti kúshtep basyp alýǵa baǵyttalǵan áreketke bardy, bılikti asyra paıdalandy degen aıyp taǵylǵan.

Másimovpen birge UQK tóraǵasynyń burynǵy orynbasary – "A" arnaıy maqsattaǵy qyzmetiniń bastyǵy A.Sadyqulov pen UQK tóraǵasynyń burynǵy orynbasary D. Erǵojın tergelip jatyr.