Ulttyq qaýipsizdik komıtetiniń qurylymy qaıta qurylady. Bul týraly vedomstvonyń resmı saıtynda habarlandy.

"Memleket basshysynyń 11 qańtarda parlament májilisiniń jalpy otyrysynda jáne 27 qańtarda qaýipsizdik keńesiniń otyrysynda bergen tapsyrmalaryn oryndaý úshin Ulttyq qaýipsizdik komıteti vedomstvonyń qyzmetin qaıta reformalaý jumystaryn bastady" delingen habarlamada.

Vedomstvoda UQK organdarynyń, onyń ishinde shekara qyzmeti men "A" arnaıy maqsattaǵy qyzmetiniń qurylymyn, mindetteri men fýnksıalaryn baǵalaý jáne ońtaılandyrý boıynsha arnaıy jumys tobyn qurý týraly aıtyldy.

"Terorızmge, transulttyq uıymdasqan qylmysqa jáne halyqaralyq esirtki bıznesine qarsy kúres, sondaı-aq ekonomıkalyq qaýipsizdikti qamtamasyz etý bólimsheleriniń qyzmetin qaıta qurý jáne nyǵaıtý máseleleri atap ótildi. Jeke quramnyń jaýyngerlik daıyndyǵyn kúsheıtý boıynsha sharalar ázirlendi" delingen vedomstva habarlamasynda.

Sonymen qatar, terorızmge qarsy kúres jónindegi respýblıkalyq jedel shtab kúshtik qurylymdar men memlekettik organdardyń TQO rejımi jaǵdaıyndaǵy birlesken is-qımyldaryna taldaý júrgizýde.

"Bul jumystyń nátıjesinde ulttyq qaýipsizdik organdarynyń jedel-qyzmettik is-qımylyn uıymdastyrýdyń qurylymy men tásilderi qaıta uıymdastyrylady" dep atap ótti Ulttyq qaýipsizdik komıteti.

Prezıdent Qasym-Jomart Toqaev 11 qańtarda Ulttyq qaýipsizdik komıteti eldegi qaýipti qaterdi anyqtaı almaǵanyn aıtqan.