Premer-mınıstr Álıhan Smaıylov úkimettiń keńeıtilgen otyrysynda Qazaqstanda ýtılızasıalyq alym stavkasy aıtarlyqtaı tómendeıtinin málimdedi.

– Qorshaǵan ortany lastaıtyn zattardy azaıtýǵa, qaldyqtar men sý resýrstaryn basqarý júıesin jetildirýge, kólderdi qalpyna keltirýge baǵyttalǵan sharalar júzege asyrylyp jatyr. Avtokólik pen aýyl sharýashylyǵy tehnıkasynan alynatyn ýtılızasıalyq alym stavkasyn ájeptáýir tómendetý kózdelip otyr, – dedi Smaıylov.

Sonymen qatar úkimet basshysy tehnologıalyq qajettilikter úshin tushshy sýdy tutynýdy azaıtý, qoqys oryndarynyń sanyn qysqartý sharalary júrgiziletinin atap ótti.

Toqaev 11 qańtarda ýtıl alymy mólsherin qaıta qarap, jekemenshik "ÓKM operatory" kompanıasynyń qyzmetin toqtatýdy tapsyrǵan. 

Búgin prezıdent Qasym-Jomart Toqaevtyń tóraǵalyǵymen úkimettiń keńeıtilgen otyrysy ótip jatyr.