Jambyl atyndaǵy Qazaq memlekettik fılarmonıasynyń aldynda halyq aqyny Súıinbaı Aronulynyń 200 jyldyǵyna oraı eńseli eskertkishi boı kóterdi. Bul týraly Qamshy portaly Aıqyn-aqparatqy silteme jasaı otyryp habarlaıdy.

Tastuǵyrdyń tusaýkeser rásimin shahar basshysy Baýyrjan Baıbek pen Senat depýtaty, Qazaqstan Jazýshylar odaǵy basqarmasynyń tóraǵasy Nurlan Orazalın ashty. 

Baýyrjan BAIBEK, Almaty qalasynyń ákimi:
– Elbasy Nursultan Nazarbaev  «qa­zaqtyń búkil tarıhy – birigý ta­rıhy, tutastaný tarıhy» degen bo­la­tyn. Súıinbaı babamyzdyń da jyr­lary halyqty aýyzbirlikke, tu­tas­tyqqa shaqyrady. Aqynnyń kóp­tiń muńyn aıtyp, «bórili baıraq as­tyna ısi qazaq balasyn birik­tir­sem» degen ıdeıasy búgingi tańda jú­zege asyp otyr. 

Súıinbaı aqynnyń 200 jyldyq mereıtoıy elimizdiń bar­lyq óńirlerinde atalyp ótýde. «Nur Otan» partıasynyń uıyt­qy bolýymen Astana qalasynda ótken ǵylymı-tájirıbelik kon­ferensıa mereke­-lik konsertke ulasty. Sondaı-aq partıanyń qoldaýymen qalamger aǵa­myz Rollan Seısenbaev «Uly jazý­shylar men oıshyldar» se­rıa­symen Súıinbaı men Jambyl ata­larymyzdyń jyr jınaǵyn basyp shyǵardy. 
Uly Muhtar Áýezovtiń shaıyrdy Jetisý aqyndarynyń al­tyn diń­gegine teńeýi kezdeısoqtyq emes. Aqynnyń qaıratkerlik kelbeti áıgili Qataǵanmen aıtysynda jan-jaqty kórinse, Maı­lyqoja, Te­zektó­re­men bolǵan sóz saıysynda onyń batyrlyq rýhy, qaısar minezi sulý jyr bolyp tógildi. Ol – aıtys ónerin ja­ńa bıikke kóterip, taqyryp aıasyn keńeıtken jasampaz tulǵa. Zamany qaıshylyqtarǵa toly babamyzdyń Suranshy, Saýryq, Ótegen, Qarasaı batyrlarǵa arnalǵan tarıhı jyr-tolǵaýlary halyqty otarshyldyqqa qarsy turýǵa sha­qyrdy. Táýelsiz el bolýǵa úndedi. Erlikti, birlikti jyrlady. Súıinbaı­dyń aqyndyǵy tek qazaq qaýymdyǵyna emes, kórshi Orta Azıa halyqtaryna da jaqsy tanys boldy. Ol qazaq-qyrǵyz halyq­tarynyń dostyq qarym-qatynasyn nyǵaıtýǵa erekshe úles qosty. «Manas», «Rús­tem-Dastan»,«Totynama» sıaqty eki el ara­synda keń taraǵan et­nıkalyq dastandardy ózinshe máner­men tańdy-tańǵa uryp jyrlady. 
Uly babalarymyzdyń asqaq armandary oryndalyp, elimiz Táýel­sizdikke qol jetkizdi. Endi olardyń shyǵarmalaryn tú­gendep, rýhyna arnap eskertkishter qoıyp jatyrmyz. Aıbyndy aıtysker aqyn, adýyndy jyrshy, qazaq poezıasynyń alyby Súıinbaı Aronulynyń qurmetine arnalǵan eskertkishtiń ashy­lýy qutty bolsyn!
Budan keıin sóz alǵan Almaty oblysynyń ákimi Aman­dyq Batalov Súıinbaı Aronulynyń Almaty oblysy, Jambyl aýdany Qaraqastek jerinde týylǵanyn aıta kelip, mereıtoı qar­sańynda atqarylyp jat­qan isterge toqtalyp, halyqty aldaǵy josparlarmen qulaǵdar etti.
– Astana qalasynda «Nur Otan» partıasynyń qoldaýy­men jáne Halyqaralyq Túrki akademıasynyń uıymdasty­rýymen «Alataýdyń aqıyǵy» atty halyqaralyq konferen­sıa ótti. Odan keıin Elbasynyń tapsyrmasymen Almaty ob­lysynan bir top delegasıa jáne Súıinbaı atyndaǵy fılar­monıa artıseri Túrkıaǵa baryp, eki-úsh qalasynda konsert berdi. Ankara qalasynyń dál tórinde túrkitildes halyqtar arasynda ataǵy jaıylǵan aqynnyń qurmetine keremet saıabaq ashyldy. Bizdi Qazaqstannyń Túrkıadaǵy elshisi Janseıit Túı­mebaev pen TÚRKSOI-dyń bas hatshysy Dúısen Qaseıinov erekshe qoldady. Sol joly atalmysh saıabaqqa «babamyzdyń eskertkishin qoıamyz» dep ýáde berip keldik. Qazir osy maqsat­ta jumys istelýde. Budan bólek, toı qar­sańynda aýyldyń jolyn jóndep, Súıinbaı atamyzǵa mekteptiń atyn berdik. Aldaǵy qazan aıynda as ótkizip, báıge uıymdastyramyz, – dedi Amandyq Ǵabbasuly. 
Jıyn barysynda aqyn-jazýshy Nurlan Orazalın, Rollan Seı­sen­baev jáne Ulttyq Ǵylym akademıasynyń qurmet­ti akademıgi Tólegen Qojamqulov, M.Áýezov atyndaǵy Ádebıet jáne óner ınstı­týtynyń dırektory Ýálıhan Qalıjan sóz sóı­lese, belgili aqyn Serik Qalıev jyrdan shashý shashty. 
«Sózdiń piri  – Súıinbaı» atalǵan ekinshi bólimdi gastról­dik-konserttik bólim basshysy Amantaı Berǵalıev júrgizip, Súıin­baı Aronulynyń ósıet-termelerine kezek berdi. N.Tilendıev atyndaǵy akademıalyq fólklorlyq-etnogra­fıa­lyq «Otyrar sazy» orkestri, ánshi-jyrshy Erbolat Shaldy­bekov, Maqpal Toqtaǵan jáne basqa da dástúrli ánshiler óner kór­setip, sońynan aqyn rýhyna Quran ba­ǵyshtaldy. 
Mekeme dırektory Aqan Ábdýáliniń aıtýynsha, «Meniń pirim – Súıinbaı, sóz sóılemen syıynbaı» dep jyrlaǵan Jambyl men ustazy Súıinbaıdyń rýhynyń bir jerde toǵysýy – qýanarlyq jaǵdaı. Keıingi jastarǵa – taǵlym, urpaqqa –  ónege!