Erteń, 17 aqpan kúni saǵat 20:30-da "QAZAQSTAN" ulttyq telearnasynan prezıdent Qasym-Jomart Toqaevtyń suhbaty kórsetiledi. Bul týraly prezıdenttiń baspasóz hatshysy Berik Ýálı habarlady.
"Prezıdent suhbat barysynda qasiretti qańtar oqıǵasynyń sebep-saldary men aldaǵy ýaqytta júzege asyrylatyn saıası jáne áleýmettik reformalar, Qazaqstannyń syrtqy saıasattaǵy strategıalyq seriktesterimen qarym-qatynastaryna, qabyldaǵan sheshimderine qatysty saýaldarǵa jaýap beredi" delingen aqparattyq habarlamada.
Prezıdenttiń jýyrda ǵana "Habar" jáne "Habar 24" telearnalarynan suhbaty kórsetilgen. Ol jerde suhbat tek orys tilinde júredi. Bul kóptegen áleýmettik jeli qoldanýshylarynyń narazylyǵyn týdyrǵan bolatyn. Sol kezde prezıdenttiń baspasóz hatshysy prezıdent nege memlekettik emes, orys tilinde suhbat beredi degen saýalǵa jaýap berip, suhbat álemdik aýdıtorıaǵa arnalǵanyn, sondyqtan suhbattyń meılinshe keń taralýy kózdelgenin aıtqan. Onyń bul sózderi qazaqtildi ortada odan saıyn narazylyq týdyryp, qyzý talqylanǵan.
Berik Ýálı sol málimdemesinde otandyq BAQ-qa beriletin kelesi kólemdi suhbat mindetti túrde qazaq tilinde bolady degen edi.
Pikir qaldyrý