Prezıdenttiń baspasóz hatshysy Berik Ýálı ofshorlyq shottarda Q.Toqaevtyń áýletine tıesili aktıvter men Shveısarıa jáne Máskeýde birneshe jyljymaıtyn múlik bar delingen aqparatty "feık", "aqparattyq shabýyl" dep baǵalady.
"Keıbir buqaralyq aqparat quraldary jazyp jatqandaı Memleket basshysy Qasym-Jomart Toqaevtyń shveısarıalyq bankte qarjylyq shoty joq. Sondaı-aq Prezıdenttiń sheteldik bankter men ofshorlyq kompanıalarǵa da eshqandaı qatysy bolmaǵan jáne shetelde jyljymaıtyn múlki de joq. Qasym-Jomart Kemelulynyń burynǵy jubaıynyń da maqalada jazylǵandaı eshqashan qarjylyq shoty bolmaǵan. Tımýr Toqaevqa keletin bolsaq, jasy 38-de. Ol – kásipker, eshqashan memlekettik qyzmette istemegen. Ózderińiz bilesizder Prezıdent ekonomıka men saıasattaǵy monopolıany shekteýge, reformalardy júzege asyrýǵa kúsh salyp keledi. Bul Memleket basshysynyń osyndaı sheshimderin jaqtamaıtyn adamdardyń ádeıi taratyp jatqan feık aqparattyq shabýyly dep oılaımyn" delingen habarlamada.
Buǵan deıin "Credit Suisse qupıalary" transshekaralyq jýrnalısik zertteý jobasy aıasynda 2012 jyly shveısarıalyq Credit Suisse bankindegi esepshot jabylǵannan keıin Toqaevtyń otbasy Shveısarıada jeke shottary bar Brıtan Vırgın araldarynda ofshorlyq kompanıalar ashqany, 2014 jyly bir sátte 5 mıllıon dollar aktıvi bolǵan Ulybrıtanıadaǵy kompanıany basqaryp otyrǵany aıtylǵan. Buǵan qosa Toqaevtar otbasy Máskeý men Jenevada quny kem degende 7,7 mıllıon dollar bolatyn múlikti ıelengeni aıtylǵan.
"Sol jyldary Toqaev joǵary memlekettik laýazymdy qyzmet atqardy, atap aıtqanda, syrtqy ister mınıstri, premer-mınıstr jáne senat spıkeri boldy. Toqaevtyń da, áıeliniń de kásibi nemese basqa baılyq kózi bolǵan joq. Tek olardyń uly Tımýrdyń naqty bızneske qatysy bolǵan, onyń ózi de muqıat zertteýdi qajet etedi. Qazaqstandyq BAQ taratqan aqparat boıynsha, ol munaı ken ornyn ıgerý quqyǵyna ıe bolǵan munaı kompanıasynyń ortaq ıesi retinde tirkelgen. Keıin bul kompanıa mıllıondaǵan tabys tapty. Ol kezde Tımýr endi 18 jasqa tolǵan" delingen jýrnalısik zertteýde.
Pikir qaldyrý