Ekologıa, geologıa jáne tabıǵı resýrstar mınıstri Serikqalı Brekeshev 23 aqpanda ýtılızasıalyq alym kólemi anyqtalatynyn málimdedi.

– Erteń avtokólik pen aýyl sharýashylyǵy tehnıkalaryna ýtılızasıalyq alym stavkalary jarıalanady. Al aýdarylǵan aqsha boıynsha, aqparat bárine belgili. "ÓKM operatorynyń" esepshottarynda, "ÓKM operatorynyń" EDB shottarynda shamamen 220 mıllıard teńge bar. Ol qaýly boıynsha, "Jasyl Damý" AQ-qa berilgen, –  dedi Serikqalı Brekeshev.

Qoǵamda ýtılalym mólsheriniń joǵary bolýyna baılanysty narazylyq kóp.

Jýyrda prezıdent Qasym-Jomart Toqaev úkimetke ýtılızasıalyq alym stavkasyn qaıta qaraýdy jáne "Operator "ROP-tyń" qyzmetin toqtatýdy tapsyrǵan. Ashyq derekkózderde "Operator "ROP"  eks-prezıdent Nursultan Nazarbaevtyń kenje qyzy Álıa Nazarbaevaǵa tıesili ekeni aıtylady.

19 qańtarda úkimet "ÓKM Operatory" JSHS-nyń (Operator ROP) qyzmetin toqtatyp,  óndirýshilerdiń keńeıtilgen mindettemelerin, ákimshilendirý fýnksıalaryn memlekettik uıym – "Jasyl damý" AQ oryndaıtynyn habarlaǵan. Uzamaı jýrnalıs Vadım Boreıko ýtılalym jınaıtyn jańa uıym retinde belgilengen "Jasyl damý" aksıonerlik qoǵamyna burynǵy operator "ROP"-tyń qojaıyny, eks-prezıdent N.Nazarbaevtyń kenje qyzy Álıa Nazarbaevanyń qatysy bar ekeni týraly jazdy. Buǵan qatysty úkimet reaksıa tanytqan joq.