Reseı prezıdenti Vladımır Pýtın keshe "Donesk halyqtyq respýblıkasy" men "Lýgansk halyqtyq respýblıkasynyń" egemendigi men táýelsizdigin moıyndaý týraly jarlyqqa qol qoıdy. Al Ýkraına men batys elderi Reseı áreketin Ýkraınanyń egemendigi men aýmaqtyq tutastyǵyn buzý dep baǵalaıdy. Tómende baspasóz ben áleýmettik jelide qyzý talqylanyp jatqan "DHR", "LHR" qalaı paıda bolyp, qandaı jaǵdaıda qurylǵany týraly qysqasha aqparat usynylǵan.
"Donesk halyqtyq respýblıkasy" men "Lýgansk halyqtyq respýblıkasy" – Ýkraınanyń shyǵysynda ornalasqan Donbass aımaǵyna kiretin Donesk jáne Lýgansk oblystary aýmaǵynda ózin táýelsiz dep jarıalaǵan separatıstik memleket. 2014 jyly Ýkraınadaǵy saıası daǵdarys barysynda jańa úkimetke qarsylyq retinde paıda bolǵan. Táýelsizdikterin 2014 jylǵy 12 mamyrda jarıalaǵan. Sodan beri keshegi kúnge deıin olardyń táýelsizdigin ishinara táýelsiz dep tanylǵan Ońtústik Osetıa respýblıkasy ǵana moıyndaǵan. Birikken ulttar uıymy, Eýro odaq, Eýropa qaýipsizdik jáne yntymaqtastyq uıymy sekildi halyqaralyq bedeldi uıymdardyń eshbiri separatıstik respýblıkalardyń táýelsizdigin moıyndamaǵan.
"Lýgansk halyqtyq respýblıkasy" táýelsizdigin jarıalaǵan soń Reseı quramyna kirýge nıet bildirip, "Donesk halyqtyq respýblıkasymen" konfederatıvtik "Jańareseı" memleketin qurý boıynsha kelisimge kelgen. Alaıda Mınsk kelisimin júzege asyrý úshin ýaǵdalastyq ýaqytsha toqtatylǵan.
Al DHR bıligi Ýkraına bıligin Donbassta "beıbit turǵyndardy qyrǵan" "qylmystyq rejım" dep tanıdy.
Qos elde de joǵary laýazym ıesi, atqarýshy bılik jetekshisi – eldiń basshysy sanalady. Memlekettik ınstıtýttar tolyq jasaqtalyp bolmaǵan.
"DHR"-da 2 mln 200 myńnan astam, "LHR"-da 1 mln 400 myńnan astam adam turady. Halqynyń basym bóligin ýkraınder men orystar quraıdy. Qos elde de jalǵyz memlekettik til – orys tili.
Ýkraına bıligi separatıstik memleketterdi Reseı federasıasy basyp alǵan Donesk jáne Lýgansk oblystarynyń bir bóligi dep tanıdy. Reseı bolsa, Donbasstaǵy qarýly qaqtyǵysqa qatysy baryn joqqa shyǵarady. Ýkraına konstıtýsıasyna saı, "DHR" men "LHR" ıelik etetin aýmaq Ýkraınanyń memlekettik egemendigi áreket etetin aımaq bolyp sanalady. Qazirgi ýaqytta separatıstik respýblıkalar burynǵy Donesk pen Lýgansk oblystary aýmaǵynyń úshten bir bóligin baqylaıdy. Ózderi eki oblys aýmaǵyna tutas ıelik etemiz dep esepteıdi. Qos respýblıka da Ýkraınada terorıstik dep tanylǵan.
Donbasstaǵy jaǵdaı sheshilmegen konflıkt retinde jıi sıpattalady.
