Qos búıregi birdeı semip, aýyr syrqatqa dýshar bolǵan daryndy jas kúıshi-ustaz Bekzat Mustafaevqa Belorýs memleketinde ota jasaý úshin qomaqty qarajat qajet. Ónerli jigitke qarjyny jınaý ońaı bolmaı tur. Sondyqtan jas kúıshi sharq uryp aqsha tabýmen álep. Qolynan keleri qara dombyrasymen kúı shertip, kópshilikti qaıyrymdylyq konsertine shaqyrý. Sondaı is-sharalardyń biri 27 aqpan kúni Almatydaǵy A.Jubanov mektep-ınternatynyń úlken zalynda ótedi.

Bekzat ota jasatý úshin byltyr Belorýste arnaıy tekseristen ótip, donorlyq transplantasıalaýdyń kezegine turyp kelgen. Ol saparǵa jumsalǵan qarjy da Bekzatqa mańdaı ter, tynymsyz eńbektiń, júregi jumsaq, qoly ashyq jomart ta meıirimdi jandardyń arqasynda jınaldy. 

Daryndy jigit aldymen shapqylap júrip, ónerdegi úlken-kishi áriptesteriniń qoldaýymen, byltyr mamyr aıynda "Ańsaý" dep atalatyn onlaın formatta konsert berdi. Munymen toqtamaı quzyrly mınıstrlikterge usynys-tilek hattarmen shyqty. Sonyń nátıjesinde, maýsym aıynda "Men seni súıemin, Ómir!" atty qaıyrymdylyq konsertin ótkizdi. Oǵan "Otyrar sazy" fólklorlyq-etnografıalyq orkestri jáne jekelegen tanymal óner tulǵalar, sonymen birge óziniń baýlyp júrgen tańdaýly shákirtteri qatysty. Ónerpazdyń bul konserti "ABAI TV" telearnasynan kórsetildi.

Osynaý úlken is-sharanyń bárin Bekzat aptasyna úsh kún Dıalız ortalyǵyna baryp, jasandy qan tazartý prosesin basynan keshe júrip, keı kúnderi 200-ge deıin kóterilgen qan qysymyna tóze júrip atqardy.

Aýyr syrqatty jeńý jolynda Bekzat kezekti ret qara dombyrasyn qolyna almaq. 27 aqpan kúni "Amanat" óner ortalyǵy men ózi túlep ushqan A.Jubanov atyndaǵy óner mektep-ınternaty ujymdary qoldap, qolǵabys jasaýymen "ÓMİR-ÓZEN AǴADY..." atty qaıyrymdylyq konsert ótkizilmek.

Konsert Almaty qalasynda Daryndy balalarǵa arnalǵan A.Jubanov mektep-ınternatynyń úlken konsert zalynda saǵat 15:00-de bastalady.

Konsertti ótkizýge "Amanat" óner ortalyǵynyń jetekshisi, QR Eńbek sińirgen qaıratkeri, dástúrli ánshi Sáýle Janpeıisova muryndyq bolyp otyr. Keshte óner ortalyǵynyń ustazdary jáne úzdik shákirtteri óner kórsetedi. Kirý tegin. Tek kelýshiler talantty kúıshiniń ónerimen sýsyndap, qoldaý retinde Bekzattyń esep-shotyna árkim múmkindiginshe aqsha aýdarsa, bolǵany.

Daryndy ónerpazdyń otasyna qarjy jınaýǵa atsalysamyn degen jandar úshin tómende Bekzattyń esep-shottarynyń rekvızıtteri kórsetilgen:

REKVIZITTER:

MUSTAFAEV BEKZAT DÁÝRENULY

KASPI GOLD: 4400 4301 6544 0931

HALYK BANK: 4405 6397 6384 0350